Shillong, Nohprah, 11: Ki paidbah nongshong jong ka shnong Mustoh kaba hap hapoh ka Shella Confedaracy hapoh ka jingïalam jong u Secretary u Bah David Rapmai, ha ka sngi Palei ki la tur sha ophis treikam ka Khasi Hills Autonamou District Council (KHADC) hadien ba la pynsangeh noh ïa ka elekshon jied nongkitkam.
Ha ka jingïakren bad ki lad pathai khubor u Bah Rapmai u la ïathuh ba ka elekshon jong ka Dorbar Shnong kaba la buh ban long ha ka sngi Thohdieng ka la shah pynsangeh ha ua Wahadadar jong ka Shella Confedaracy u Bah Sothish Youroin.
U la ong ba ka jingtur jong ki paidbah sha ophis jong ka District Council ka long ban pan ïa ka bor na ka KHADC ba ïaid beit shakhmat ban pynlong ïa ka elekshon kumba ladep rai da ka Dorbar Shnong naduh u bnai Naitung, 2025 namarba ka samoi treikam jong ki nongkitkam kan sa kut noh ha ka 18 tarik, Nohprah, 2025.
“Ngi la pynbeit nadong shadong ïa baroh ki kam bad sa tang ban pynlong ïa ka elekshon hynrei ngi la ïoh jingtip lyngba u Wahadadar ba la pynsangeh noh ban pynlong ïa ka elekshon namar ka jingujor da u Acting Rangbah Shnong, jong ka shnong u Bah Wilson synrem uba la kam ba la rai ban pynlong ïa ka elekshon khlem ka jingtip u,” la ïathuh u Bah Rapmai.
U Bah Rapmai u la ïathuh ba ka daw hi ka dei namar ka jingujor u Acting Rangbah Shnong u Bah Willson Synrem sha u Wahadadar da kaba ong ba ka shnong ka ïaid lait ïa u hynrei u la ong ba ka shnong ka hap ïaid lait namarba hadien ba la sospon ïa u Rangbah Shnong ba pura u Bah Gregory Chyne, u Wahadadar u la thung Acting Rangbah Shnong ïa u Bah Willson khlem da pynithuh pat sha ki nongshong shnong kumba ju long ka rukom.
Hadien ka jingïakren bad u CEM ka KHADC, u Bah Rapmai u la ïathuh ba ïa mynta la hap ban pynsangeh noh shwa khnang ba kan ym mih kano kano ka jingbym sngewtynnad hynrei u la kular ba shuwa ka 18 tarik, Nohprah, 2025 yn sa pynlong ïa ka elekshon jied nongkitkam shnong ïa kaba yn pynïaid hi da ka District Council.
