Shillong, Nailur, 18: Ki dkhot jong ka Hynñiewtrep Youth Council (HYC) Sohïong Circle kiba la hiar hi dalade sha ka shnong Wahnongkseh, East Khasi Hills District ha ka sngi Balang ki la sakhi da la ki jong ki khmat ïa ka jingpyntrei torti jong u Kontraktor ïa ka skhim Jel Jevan Mission (JJM.
Shwa ba ka seng kan leit jurip ïa ka jingpyntrei ïa ka skhim JJM ha Wahnongkseh, dang shen ki nongïalam ka seng ki la leit ban ujor shuwa ha ka ophis u Executive Engineer ka Public Health Engineering (PHE) Electrical Division, Mawphlang Division ha ka 2 tarik Nailar 2024 bad ka seng ka la aipor ruh ar taiew ïa ka Ophis ba kan phah ïa ki ophisar ba kin leit jurip ïa ka jingpyntrei ïa ka skhim JJM ha ka shnong Wahnongkseh bad la kynnoh ba la jan dap ar bnai eiei na ka liang jong ka Ophis kam shym la leh eiei satia halor kane ka jingujor jong ka seng.
“Mynta ka sngi ngi la wan hi ban jurip hi ïa ka jingpyntrei ïa ka skhim JJM ha kaba ngi la lap ba bun na ki pipe ki la dkut lut bad wat ka jaka pynlang um ruh kam pat don satia,” ong u President ka HYC, Sohïong Circle u Bah Purningstar Shabong.
U la ong, haba la tohkit na ki nongshong shnong ki la ïathuh ba mynta la sdang ban pyntrei ïa ka jaka ban pynlang um hynrei ym shym la shna satia da ka top dewbilat hynrei la shu thmu ban shna da ka top tin.
“Ki paidbah nongshong shnong ki la pynpaw ba kim hun satia ban shna ïa ka jaka pynlang um da ka top tin bad ki ong ruh ba balei kiwei ki shnong ki ïoh da ki top dewbilat hynrei ïa ka shnong Wahnongkseh la ai da ka top tin sarang kaba pei thliew,” la ïathuh u Bah Shabong.
U Bah Purningstar Shabong u la ong ruh ïoh lehse ba ka jingdkhoh ka jingpyntrei ïa ka skhim JJM ka lah ban long namarba u Kontrator u dei hi u Chairman jong ka WVC bad dei na kane ïoh u shimkabu.
“Ngim kwah ba ïohba ka kane ka skhim kan shu jah ei bad kan pynsyrwa ei ïa ka pisa jong u paidbah,” u la ong.
“Ngi la ïohi ba ka jingpyntrei ïa ka Retrofitting Scheme for Providing ( FHTC) skhim ha ka shnong Wahnongkseh ka long kaba torti bha haduh katta katta bad sa kawei ruh la shu pyndait da ki pipe um kiba rit ki bym ïahap bad ka jingdon jong ki longïing kiba pyndonkam ïa ka um ki don haduh 17 tylli ki longiing bad ar tylli ki skul,” u la ong.
