Shillong, Naiwieng, 14: Ka Hynniewtrep Youth Council (HYC) ka la dawa ban ai jngpynshai mardor bad ban pynsangeh noh ïa jingkynnoh ba la shna ïa ka jaka mane blei ba dang ïaid shakhmat hapoh ka jaka treikam jong ka Central Bureau of Investigation (CBI) kaba don ha Mawdiangdiang, New Shillong Township.
Ha ka dorkhas ba la aiti sha u Head of Branch ka CBI ha ka sngi Thohdieng, ka HYC ka la kynnoh ba la tei ïa ka jingtei kaba la kam ba ka dei ka temple hapoh ka phyllaw jong ka CBI, kaba la pynmih ïa ka jingsngewkhia halor ka jingpynkheiñ ïa ka riti synshar jong ka ri bad ki aiñ jong ka jylla.
Ka la dawa ïa ka CBI ban pynshai ïa ki jingshisha halor kane ha kaba ïadei bad ka jingtei ïa ka jaka mane blei hapoh ka shlem treikam jong ka CBI.
“Ba, katba dang ap ïa ka jingpynshisha, baroh ki kam kiba ïadei bad kano kano ka jingthmu ne jingtei jaka mane blei kaba dang ïaid shakhmat dei ban pynsangeh noh mardor, ban ïada na ka jingpynkylla jaka mane blei hapoh ka jaka treika lane kaba lah ban long kum ka jingpynkhein ïa ka aiñ,” la ong u President jong ka HYC u Bah Roykupar Synrem da kaba bynrap “Ba, lada lap ba ïa ka jingtei la sdang khlem da ïoh jingbit, dei ban leh eiei noh mardor hapoh ka Public Premises (Eviction of Unauthorised Occupants) Act, 1971 bad ki kyndon kiba ïadei ha ka Jylla Meghalaya da kaba pynpra noh ïa ka jingtei ba khlem ïoh jingbit bad ban pynlong beit tang kum ka jaka treikam.
Ka HYC ka la dawa ïa ka CBI ban ai jingpynshai hapoh ar taiew, kaba kdew ba ka jinglong ba shisha ba mynta, ki jingmynjur ba la ïoh lada don, bad ki lad ki lynti ba la shim ban ïada ïa ka jingbud ryntih ïa ka riti synshar bad ka aiñ.
Ka HYC ka la banjur ba ka jingujor kam dei pyrshah ïa kano kano ka jingngeit hynrei ka thmu ban ïada ïa ka jinglong laitluid bad ka jingshaniah jong ki paidbah ha ka CBI, ka tnad tohkit kaba long pdeng.
“Ïa kane ka dorkhas la ai ym ban pyrshah ïa kano kano ka jingngeit ne ka jaitbynriew, hynrei ban ïada ïa ka jinglong laitluid jong ka jingsynshar paidbah. Ka Ophis jong ka CBI, da kaba pynneh ïa ka jinglong ba pdeng, ka ieng kum ka nongïada ïa ka riti synshar bad ka hok kaba long mar ryngkat. Ka HYC ka buh ïa ka jingshaniah kaba khraw ha ka jinglong ba janai bad ka jingkitkhlieh jong ka ophis jong phi bad ka ngeit ba ki jingpynbeit kin long ha ka katkum ka aiñ,” la bynrap ka Seng.
U Bah Synrem u la pynpaw ba ka jingtei, lada pynthikna, kan long pyrshah ïa ki aiñ shna ïing jong ka Meghalaya Bye-Laws, 2021, kiba donkam ban ïoh jingbit shwa da ka jingthoh na ka bynta kano kano ka jingpynkylla ïa ka jingpyndonkam ïa ka jaka, bad ïa ka Public Premesis (Eviction of Unautised Occupants) Act, 1971, kaba khang pyrshah ïa ka jingpyndonkam khlem jingbit jong ka Sorkar.
Ka dorkhas ka kdew ruh ïa ki kyndon jong ka riti synshar bad ki rai jong ka Iingbishar Supreme Court, kum u S.R. Bommai pyrshah ïa ka Sorkar India bad Kesavananda Bharati pyrshah ïa ka Jylla Kerala, kiba pynskhem ïa ka jingïapher ïa ka jylla bad ka jingmane blei kum ka jinglong ba kongsan jong ka riti synshar, kaba bthah ïa baroh ki tnat treikam jong ka jylla ban pynneh ïa ka jinglong ba ieng pdeng.
“Ka Ophis CBI ka dei ka dak jong ka jingkular jong ka Sorkar ban tohkit khlem ïashah liang bad pyntreikam ïa ka aiñ. Ka jingshaniah ha ka tnat treikam jong ka ka shong ha ka jingsngewthuh ïa ka jinglong pdeng bad jinglong hok jong ka hakhmat ki nongshong shnong jong manla ki niam, jaitbynriew, ne ka tynrai. Ka jingtei ïa ka temple ne kino kino ki jingtei niam kiba don jingma ha kane ka jingsngewthuh, ka jingïadei kaba lah ban ïohi hapdeng ka Sorkar bad kawei ka jingngeit kyrpang. Kum kane ka jingkyrshan kan ym long tang kaba ïaleh pyrshah ïa ki nongrim jong ka jingïaryngkat bad ka jinglong niam hynrei ka lah ruh ban pynjngai ïa ki jaitbynriew, da kaba pynduna ïa ka jingshaniah jong ki paidbah ha kawei na ki jaka treikam ba kongsan tam jong ka Sorkar,” la ong shuh shuh u Bah Synrem.
