RAI BAN THOH SHA KA PRESIDENT KA RI BAD SHA U LAT
Shillong, Naiwieng 08: Ka Joint Action Committee (JAC) jong ka NEHUTA, NEHUNSA bad NEHUSU ha ka sngi Balang ka la byrngem ban mudui ha Ingbishar Meghalaya High Court da kaba kynnnoh ba u Vice Chancellor jong ka skulbah North Eastern Hills University (NEHU) u Prof. PS Shukla u la pynkheiñ ïa ki kyndon jong ka University Grants Commission Model CRR (Cadre Recruitment Rules) da kaba thungkam be-aiñ ïa u Rohit Prasad kum u Technical Consultant hapoh ka skulbah NEHU.
Ha ka jingïakren bad ki lad pathai khubor u Chairman jong ka JAC u Prof Lakhon Kma u la kynnoh ba ka jingsaitkhuid jong u Prof. Shukla dang shen ha ka jingïakren bad ki lad pathai khubor haba ïadei bad ka jingthungkam sopsop ïa u Rohit Prasad kum u Technical Consultant ka dei ka jingthok jingshukor bad ka jingïalam bakla ïa ki samla pule bad ïa ki nonghikai jong ka skulbah NEHU bad ïa ki paidbah nongshong shnong jong ka Jylla Meghalaya.
U Prof. Kma u la ïathuh ba ka JAC kan sa thoh sha ka President jong ka Ri India ka Droupadi Murmu bad sha u Lat ka Jylla u Phagu Chauhan ban ujor pyrshah halor ka jingpynkheiñ ïa ki kyndon treikam jong ka skulbah NEHU kaba hap hapoh ka jingpeit jingkhmih jong ka Sorkar Pdeng.
“Ka JAC kan sa shong ïa ka jingïalang ha ka 9 tarik mynta u bnai ba shim ïa ka rai kumno ban ïaid shakhmat ïa ki jingïakhih bad ban ïaphylliew jingmut, la ka donkam ne em ban ujor sha Meghalaya High Court pyrshah ia u Vice Chancellor ka NEHU,” ula ong.
Haba takraiñ tyngeh bad pynrem jur ïa ka jingpynksan jong u Prof. Shukla halor ka jingthungkam ïa u Rohit Prasad, u Chairman ka JAC u la ong, “dang shen u Vice Chancellor ha ka jingïakren bad ki lad pathai khubor u la pynksan ba ka jingthungkam ïa u Rohit Prasad ka long katkum ki kyndon ka UGC Model CRR hadien ba la mynjur da ka Executive Council jong ka skulbah NEHU, hynrei baroh ka long kaba be-aiñ namar ba ka long pyrshah ïa ki kyndon treikam jong ka skulbah NEHU ïa kaba ym shym la khot wat tang ïa ka Advertisement thungkam.”
U Prof Lakhon ula kam ba katkum ki kyndon jong ka UGC Model CRR ka kdew shai ba ki Vice Chancellor jong kano kano ka skulbah kim lah ban thungkam, hynrei ïa ka jingthungkam dei ban khmih hi da ka Selection Committee bad hadien kane ka Executive Council kan sa lah ban ai jingmynjur, ïano ban thung ha ka kam.
“Ki kyndon jong ka UGC Model CRR ki kdew shai ba lada ka skulbah ka donkam nongtrei ka dei ban pyntip sha ka University Grants Commission (UGC) na ka bynta ban mang pisa, hadien ba la ïoh jingmynjur na ka UGC ka skulbah ka dei ban pyntip paidbah lyngba ki Advertisement ha ki kotkhubor bad hadien kane yn sa shong da ka Selection Committee ban leh ïa kaba donkam kum ka interview,” la ïathuh u Prof Lakhon bad bynrap, “hynrei u Vice Chancellor um shym la bud ïa kine ki kyndon ba la kdew hynrei u la shu pyntip beit beit ba la thung ïa u Rohit Prasad hadien ba ula shim hi ïa ka ban shu leh ïa ka online interview hadien ba la mynjur da ka Executive Council.”
Na ka liang jong ka NEHUSU lyngba u Secretary ka la pynrem jur ïa ka jingbym lah jong u Vice Chancellor ban peit ïa ka jingeh jong ki samla pule wat hadien ba ka Union ka ladep pynsngew ïa kiba bun ki jingdawa na ka por sha ka por.
