Shillong, Risaw 16: Ka All India Trinamool Congress (TMC) ha ka sngi Balang ka la phah ka jingujor pyrshah ïa ka National People’s Party (NPP) halor ka jingkynnoh ba ka la pynkheiñ ïa ka Model Code of Cconduct (MCC) da kaba sam ïa ki tin sopïing sha ki paidbah jong ka Gambegre Constituency.
Kane ka jingujor ka long namarba ka Gambegre Constituency kan sa leit sha ka elekshon shiteng samoi ka ban long ha ka 13 tarik, Naiwieng, 2024.
Ha ka shithi ba la phah sha u Returning Officer, u District Co-ordinator jong ka TMC West Garo Hills u S. N Sangma u la ong, “la pyntip da ki nongtrei jong ka party ha kaba ïadei bad ka jingpynkheiñ ïa ka Model Code of Conduct da ki nongtrei jong ka NPP kiba la sam ïa ki CGI sheets ne ki tin sopïing sha ki nongshong shnong ha Aminda Simsang kum ka jingpyrshang ban khroh ïa ki paidbah nongthep vote.”
“Kane ka jingpyndonkam bakla ïa ki tiar jong ka Sorkar ym tangba ka long tang kaba sniew hynrei ka long ruh kum ka jingpynbiej,” u la kynnoh.
“Wat hapdeng ba ka Election Commission of India (ECI) ka la dep ban pynbna ïa ka tarik ban pynlong ïa ka elekshon shiteng samoi, hynrei na ka liang ka NPP ka la ïaibteng ban leh ïa kine ki kam. Ha ka sngi Balang ruh ki la sam ïa kine ki tiar ha shnong Aminda Simsang kaba dei ka polling station no 2,” la ong u Sangma.
Shuh shuh u nongïalam ka TMC u la kynnoh ba ka NPP ka ladep ban lum lypa shibun ki tin sopïing hajan manla ki polling station bad kane ka jingleit sam jong ki ïa kine ki tiar ka la bteng khlem sangeh.
“Halor kane, nga kyrpad ïa phi ban tuklar mardor bad ban pynsangeh ïa kane ka kam bad ban pynthikna ba ka jingpynlong ïa ka elekshon kan long kaba khuid ba suba bad ka bym shah liang,” u la ong ha ka ujor.
