Mawkyrwat, Jymmang, 13: Hapdeng ka jingiakhun ban rat dyngkhong ia u drok naduh ki Sengbhalang, ki Seng Longkmie, ki Seng Samla Shnong bapher bapher hapoh South West Khasi District, kyndit kynsan ki don pat ki riew shimkabu katto katne da kaba wanrah ia ki nongbylla bar jylla ki bym biang kot biang sla kiba dei ruh ki nongdih drok kaba la pynap jingma pynban ia ki khun samla.
Ha ka miet sngi Saitjaiñ ka Seng Samla Shnong Mawlangwir ka la ioh bat ia uwei u bar jylla uba trei bylla ha ka shnong Mawlangwir uba la buaid drok bad u la shang makia ia ka shnong hynrei ki samla jong ka shnong kiba la peit siar bha ki la bat bad tohkit shano u mut ban iaid ban ieng, hynrei une u bar jylla u la pan jingpruid kylla bad tyrwa drok pynban ia ki da kaba u ong lada ki kwah drok un ialam ia ki sha iingsah jong u ban ai drok ia ki.
Kumta ki samla jong ka shnong ki la bat bad aiti ha ka KSU Mawkyrwat Circle ba kin bishar ia u bad ka KSU hadien ba ka ladep ban bishar ka la aiti noh sha ki Pulit jong ka Mawkyrwat Police Station.
Ka KSU Mawkyrwat Circle ka la pynpaw ia ka jingsngewkhia kaba jur halor kane ba wat hapdeng ka jingiakhun kaba jur bha ban rat dyngkhong ia une u jingdih basniew hapoh ka District pynban u nangkha roi kat nangmih ki sngi
Ka Seng ka la maham tyngeh ruh ia kito ki briew kiba wanrah ia ki nongbylla kiba nabar khlem ki kot ki sla kiba biang.
