Shillong, Rymphang 13: Ka tnat shipai BSF Meghalaya ka la phah ia ka jingpynshai paidbah lyngba ki lad pathai khubor ha kaba iadei bad ka jingshah leh tohmet jong u Officer Incharge ka Muktapur Veterinary Dispensary u Dr. Seiboklang Buam ha ki shipai langrut BSF kaba la jia ha ka sngi u Blei mynta ka taiew.
Ha u kyrwoh, ka tnat shipai BSF Meghalaya ka la ong, “ha ka 11 tarik Rymphang, 2024, ha ka por kumba 12:05 baje nohsngi, ki shipai langrut BSF kiba ap pahara ha khappud Indo-Bangladesh ha Hawaitila ki la iohi ia uwei u briew uba dang thmu ban leit sha wah Lakroh, kaba don markhap bad ka khappud. Haba ki shipai BSF ki la pynsangeh ban tohkit u la pynpaw pynban ia ka jinglehmeng da kaba kam ba u dei u doctor Veterinary. Ha kane ka por, ula ring video ruh wat ia ki shipai BSF kiba dang don ha ka kamram.”
“Wat hapdeng ka jingkyrpad jong ki shipai BSF ban ym ring video, hynrei une u briew u la um shym la sngap satia ia ka jingkyrpad. Hadien kane, une doctor veterinary u la leit noh na kane ka jaka bad byrngem ruh ia ki shipai BSF kiba dang don ha ka kamram. Hadien katto katne por, u la wan ialam sa ia ki nongshong shnong, bad kyrkait ia ki shipai BSF bad ring video ban pynbudnam sniew ia ki shipai,” la ong u kyrwoh na ka tnat Shipai BSF.
“Ka jingkynnoh pyrshah ba ki shipai BSF ki byrngem ban siat bad ban pynlaw lyngkhuid ia u ka dei kaba shu thaw bad ka dei kaba shu ialam bakla pyrshah ia ki shipai BSF. Ki shipai BSF kiba ap pahara ha khappud ki ai ka jingiada ia ki paidbah kiba shong basah ha ki shnong khappud. Kum kine ki jingkynnoh, ym tang ba ki pynsniewdur ia ka jingtreikam jong ki shipai kiba trei shitom wat hapdeng ki jingeh kiba bun hynrei ka pynmih ruh ia ki jingjia ki bym shongnia. Ka jingkynnoh pyrshah ia ki shipai BSF ka dei kaba shu jler bad ka bym don nongrim haei haei ruh,” la ong shuh shuh u kyrwoh.
Ha kaba iadei bad kane ka jingjia, ha ka lah sngi U Blei ki Ophisar u SDO (Civil) Amlarem Dr. Abhishek Saini, u la lum jingialang ha kaba la don lang u SDPO Amalarem Sub- Division, u Dr. Seiboklang Buam, u SHO PS-Muktapur bad ki shipai BSF.
Ha kane ka jingialang, la iakren sani ha kaba iadei bad ka jingjia kaba ladep bad la shim ia ka rai ban iasuk noh hapdeng ki arliang mamla.
U MLA jong ka Amlarem Constituency Bah Lahkmen Rymbui uba dei ruh u Chief Advisor jong ka Sorka Meghalaya u la khot jingialang halor kane ka jingjia. U Additional Home Secretary ka Sorkar Meghalaya, u IG Law & Order (Meghalaya Police), u IG Border bad u IG BSF Meghalaya ki la iakren sani halor ka jingleh tohmet jong ki shipai BSF pyrshah ia u Dr. Seiboklang Buam.
U Inspector General jong ka tnat shipai BSF Meghalaya, hadien ba u la pyntip halor ka jingjia baroh, u la kular ba ka tnat shipai BSF kan trei na ka bynta ka bha ka miat jong ka ri, wat hapdeng ki jingtynjuh kiba bun.
