Shillong, Rymphang, 13: Shi sngi hadien ba ka video ka la saphriang halor ka jingshah leh tohmet u Officer Incharge ka Muktapur Veterinary Dispensary u Dr. Seiboklang Buam ha ki shipai langrut BSF kaba la jia ha ka sngi U Blei mynta ka taiew, ka War Jaintia Student’s Union Amlarem bad Eastern Circle ka la pynpaw ia ka jingsngewkhia halor ka jingshah thombor jong ki paidbah nongshong shnong kiba sah ha ki khappud.
Ha ka lah sngi U Blei, ki nongialam ka seng ki la hiar sha ka shnong Muktapur ban leit iakynduh ia u Company Commander ka Border Out Post Muktapur bad ia ki bahaiing hasem jong u Dr. Buam ban tohkit bniah halor kane ka jingjia.
Ha ka jingialang ba la khot da u Sub-divisional Officer ka Amlarem Civil Sub –Division, ki nongmihkhmat jong ki shipai BSF ki la pan por ar taiew ban phah ia ka kaiphod tohkit sha u SDO.
Ka Seng ka la dawa ia ki shipai BSF kiba ap pahara ha ki shnong kiba don ha khppud ba ki dei ban ai ka jingiatreilang bad ki bor pyniaid shnong. Ka Seng ka kyntu ruh ia ka shnong bad ia ki shipai BSF ba kin pynlong ia ki jingiakynduh lang na ka por sha ka por ban pynsngewthuh sha ki nongshong Shnong jong ki shnong kiba don ha khappud ban lait na kum kine ki jingjia ha ki sngi ban wan khnang ban weng ia ka jingbym iasngewthuh jingmut hapdeng ki shipai BSf bad ki nongshong shnong.
Ka Seng ka la ong ruh lada kum kine ki jingjia kin dang iai jia na ka por sha ka por, ki bor pyniaid shnong bad ki shipai BSF ki dei ban shim ia ka jingkitkhlieh, ong u kyrwoh ba la phah da u Publicity Secretary ka WJSU Amlarem.
