Shillong, Nailar, 25: Ka Khasi Students Union (KSU) Wapung Unit hadien ba ladep phah ia ka ujor sha ka Jaiñtia Hills Autonomous District Council (JHADC), ha ka sngi balang, ka la ujor sa sha ka Meghalaya state Pollution Control Board (MSPCB) ban khang kyrdep noh ia ka Abhi Coke Pvt ltd.
Ka Seng hapoh ka jingialam jong u President u Samla Deiniwan Lyngdoh bad u General Secretary u samla Shwari Ryngkhlem GS ryngkat ka jingsynran lang jong u Asst. Secretary ka KSU East Jaiñtia Hills District Unit u u Samla Pynshai Kupar Dkhar ki la aiti ia ka jingujor ha u Chairman ka MSPCB.
Ha u kyrwoh ba la phah da u Publicity Secretary ka KSU Wapung Unit u samla Shibaitlang, ka seng ka la kam ba ka lap ba ka jingdon ka Abhi Coke Private Limited kam don jingmyntoi eiei ia u paidbah hynrei ka wanrah pynban ka jingma suda ia u paidbah.
Ka Seng ka lap ruh ba kane ka karkhana ka la pynkheiñ ia ki ain ki kyndon jong ka EIA 2006 ha ka jingpynmih ia u Coke.
Ka Seng ka la ong, ba katkum ka EIA 2006 kane ka karkhana Coke ka dei ban pynmih ia u Coke tang 25,000 metric ton ha ka shisnem hynrei ka la pynmih ym duna ia ka 36,000 metric ton ha ka shisnem. Ka Seng kam shongthait ban iaid shaphrang ban dawa ban khang khyrdep ia kane ka Abhi Coke Pvt ltd, ong u kyrwoh.
Ha kajuh ka por, ka Seng ka la dawa ia u Chairman ka MSPCB ba dei ban tohkit bha lyngba ka ophis jong ki ia kane ka karkhana Coke bad kumjuh ruh katkum ki kyndon jong ka EIA.
“Ka seng kam shongthait ban iaid shaphrang katba kane ka karkhana Coke kam pat khang khyrdep lada shim por da ki snem ruh ka seng kan ieng skhem ha ka nongrim ba u paidbah un ioh ban im suk ban ioh ban ring mynsiem da ka lyer kaba khuid,” ong u kyrwoh.
“Ka Seng ka dap ruh da ka jingsngewphylla ba ki briew jong kane ka karkhana coke ki la tyrwa ia ngi da ka bai bnai lada ngim iaid shaphrang”. Ka kyrwoh kaba shai sha ki briew kane ka karkhana coke phim lah ban thied ia ngi da leilei ruh ngin ieng skhem ha ka nongrim baskhem bad ngim shongthait ban iaid shaphrang ban dawa lada shim por da ki snem ruh.
Ka Seng ka kyrmen skhem ba ha kawei ka por ngin sa ioh ia ka jingjop ba u paidbah un ioh ban im suk ban ioh ruh ban ring ia ki lyer ba khuid, pynkut u kyrwoh.
