Shillong, Nailar, 26: Da ki spah tylli ki kali kiba wan na kylleng ki jylla jong ka thaiñ Shatei Lammihngi ban iaid lynti na ka surokbah National Highway-6, ha East Jaiñtia Hills District ki la sahkut ha ka dheng kali na ka jingtwa biang ka khyndew hakhmat ka Tunnel ha ka shnong Sonapur, ha ka sngi Saitjaiñ.
Ka jingtwa jong ka khyndew bad ki maw ka la jia ha ki kynta ba u lapbah uba jur u la ther ha kiba bun ki bynta jong ka jylla Meghalaya bad ki kali kiba wan na ka jylla Tripura, Mizoram bad Barak valley ki la shah khang sbak ha kane ka jingtwa khyndew.
La sakhi ruh ba ka don ka kali kaba la sahkut ha kane ka jingtwa khyndew hakhmat kane ka krem ba la shna kyrpang ban iaid ki kali.
Kat haduh ba la thoh ia kane ka khubor, ki nongtrei jong ka National Highway Authority of India (NHAI) ki la pynkhuid bad khat ia ka khyndew bad ka ktieh khnang ban pyllait ia ki kali kiba iaid lyngba kane ka surok.
U Deputy Commissioner jong ka East Jaiñtia Hills District u la pyntip, hadien ba la pynkhuid ia ka khyndew bad ia ka ktieh, la pyllait biang ia ki kali ban iaid na kane ka surok.
La bthah ruh ia ki nongñiah kali ba kin long kiba iaishah bad ym ban kyrkieh bad ha kajuh ka por ruh ban long kiba phikir bad kiba husiar haba iaid lyngba kane ka surok.
