Shillong, Nailur, 17: Ki dkhot jong ka Federation of Khasi Jaiñtia and Garo Peoples-Khliehriat Circle ba la synran lang da u President jong ka FKJGP-East Jaintia Hills u Bah Deihok Sumer ha ka sngi Baar ki la leit ban pan jingpynshai na u Superintendent of Police (SP) jong ka East Jaiñtia Hills District u Giri Prasad M. ban buddien ïa kawei ka jingujor pyrshah ïa uwei u Pulit ophisar uba bat ïa ka kyrdan Sub Inspector uba ka seng kam kwah satia ban pynpaw kyrteng hadien ba u la kyntait ban pdiang ïa ka jingujor jong ka seng ha kine ki khyndiat sngi ba la leit noh ha Ladrymbai Police Out Post halor ka jingshah tuh.
Ha u kyrwoh ba la phah u President jong ka FKJGP, Khliehriat Circle u Bah Michal Chyrmang, ka seng ka la kynnoh ba ka jingkyntait jong u Pulit Ophisar ka long tang namarba ka seng ka la thoh ïa ka ejahar ha ka ktien Khasi. Ka seng ka la pyntip ruh haba ki dkhot jong ka FKJGP ki la kylli, ka jubab kaba une u Pulit Ophisar u la ai ka long ba ha ki por ba mynshwa la shah ban thoh ïa ka jingujor ejahar ha ka ktien Khasi katba mynta pat ka Ingbishar ka la khang bad ka la bthah ba dei ban thoh beit ïa ka ejahar ha ka ktien Phareng.
Kaba kham pynlynngoh ïa ka seng ka long ba na ka liang jong u Superintendent of Police u la pynshai hakhmat ki nongïalam ba kam shym la don satia kum kata ka jingbthah na ka liang jong ka Ingbishar ban thoh ïa ka ejahar ha ka ktien Phareng hynrei ki nongujor ki lah ban thoh ïa ka ejahar ha ka ktien Khasi, Garo, Pnar bad Hindi bad ka dei ruh ka kamram jong ki Pulit ban pynkylla ktien ïa ka ejahar sha ka ktien Phareng.
Ha kaba ïadei bad kane, u Superintendent of Police u la kular ba un sa phah tohkit ïa kane ka jingjïa khnang ba kan ym jia shuh nangne shakhmat bad u la kular ruh ba ynda ladep ka jingtohkit un sa phah kopi ïa ka kaiphod tohkit sha ka seng.
