Shillong, Nailur, 24: Ki Myntri Shnong ki la mih shakhmat ban kren eiei hadien ba ki sengbhalang bapher bapher ka South West Khasi Hills District ba la lamkhmat da ka Khasi Students Union (KSU) ki la mih shakhmat ban pyrshah halor ka jingkynoh ba u Syiem ka Hima Maharam u Pa’iem Niandro Syiemiong ryngkat ka Dorbar Hima ki la thmu ban ai ïa ka jaka sha ki shipai BSF ha Sohboitram ban shna ïa ka Unit Headquarter.
Ka Synjuk ki Myntri Shnong jong ka Hima Maharam ki la lum da ka jingïalang ban ïatai sani ïa ki kynrum kynram hapoh ka Hima ha kaba ki la ïatai ruh halor ki lai tylli ki mat.
Ha ka jingïalang ka Synjuk ka la ïatai halor ka jingkynrei jong u drok hapoh ka South West Khasi Hills District, ka jingtyrwa jaka da u Syiem ka Hima Maharam ryngkat ka Dorbar Hima sha ki shipai BSF, ka jingaiwai khyndew jong ka kur Syiemlieh ïa ka jaka Ri Raid Balat-Ranikor sha ka TRUMP Suprime Company kumba 180 hektar ban tih maw shun.
Halor ka jingthmu ban ai jaka sha ki shipai BSF, ka Synjuk da kawei ka sur ki la rai ban kyntu ïa u Syiem ba un pynsangeh noh shwa ïa ka jingai jaka sha ki shipai bad ban rah ïa kane ka mat ïakren hapoh ka dorbar.
