Shillong, Nailar, 07: Ki Khlieh Rangbah Kur ba mihkhmat ïa ka Synjuk Ki Rangbah Kur: Ka Bri U Hynñiewtrep ki la leit ban kynduh ïa u Chief Executive Member (CEM) ka Khasi Hills Autonomous District Council (KHADC) u Bah Shemborlang Rynjah na ka bynta ban ai ka jingkyrshan ba pura ha ka mukotduma ba la ujor da ka Syngkhong Rympei Thymmai (SRT).
La pynsngew ïa ki nia ban ïasaid na ka bynta ban pynneh ïa ka riti kheiñkur kheiñkha na ka kmie da u Sangot ka Synjuk u Bah Rapionglang Blah, uba la batai bniah shaphang ka saw ka sian ba takhuh ka imlang sahlang lyngba ka rukom mushlia da ki kynhun ki ba angnud ban kylla noh ïa ka riti dustur sha ka ba aijait sha u kpa ne sha u shynrang.
U Bah Blah u la kdew ïa ka lanot ha u snem 2014 haba ka Iingbishar Meghalaya High Court ka la thmu ban pynduh ïa ka iktiar jong ki Rangbah Shnong bad iuhroit ïa ki Dorbar Shnong.
U la kren mardor ba ka kur leilei ka dei ka daw kaba kham khraw ïa ka jaitbynriew kaba ktah naduh ka riti bat khyndew haduh ka riti jied Longsan Mansan ha ki shnong ki Raij bad ki Hima ryngkat bad kiwei kiwei ki snap riti dustur ki ba ym lah ban lait na ka kam kur.
Nalor kata la pynsngew ruh ba ka don ka jingma ïa ka imlang sahlang ha ka pateng ka ba hadien ban sa kynrei ka shong sang ha ka pouikha poiman lada la duh noh ka tipkur tipkha.
La pynkut nia ba ka daw ba tynrai jong ka mukotduma ka long ban ïasaid na ka bynta ban ïoh ka syrnot ïada riewlum (Schedule Tribe Certificate) ïa ki briew kiba aijait sha u shynrang.
Ha kaba ïadei bad kata ka jingkwah syrnot ïada riewlum, u Bah Raphael Warjri u la ban jur ha ki ar tylli ki mat ba ka Syngkhong Rympei Thymmai (SRT) ka dei ka seng ka ba thmu ban kylla syndon ïa ka riti kheiñkur kheiñkha na ka kmie sha ka ban ai jait noh sha u shynrang bad kaba pynksan ba ka rukom aijait ka dei kat ha ka mon jong ki longiing longsem shimet.
Hynrei la kynthoh jui ba ka SRT ka thrang ban kylla noh ïa ka riti dustur ban ryngkat bad ki paidbah ba la kham kiew kyrdan ym ïahap ba kin dang dawa ïa ka syrnot ïada paid riewlum.
La banjur ruh ba ka jingsngew kyllum ha kano kino kino ki paidbynriew ka dei ban bud ryntih ha ka imlang sahlang bad ym dei da ka jingsngew shimet jongno re jongno ki ba khwan jait sha lade.
Ki dkhot rangbahkur ba la ïalam da u Bah R L Kharpran kum u khlieh rangbah bad synran da u Bah Rapiong Lang Blah, Bah Manstudy Nongrem, Bah Raphael Warjri, Bah Aristotle Lyngdoh, Bah Ploster Syiem, Bah Kyrmen Uriah bad Bah Wilbert Shylla, ki la ieng rangbah da kawei ka sur ba ka Synjuk ka kloi ban aikti ïa ka Dorbar Thawaiñ Dalariti Rilum Khasi ha kane ka bynta ban aireng ïa ka jingthmu jong ka Syngkhong Rympei Thymmai ki ban pyntroiñ ïa ka jaitbynriew.
