Shillong, Nailar 10: Ka kot shaphang ka riti kheiñkur kheiñkha na ka kmie ba la jer ‘MEI- Matrilineal Exogamous Institution’ ha ka ktien phareng la pyllait paidbah da u Bah Prestone Tynsong, Symbud Myntri Rangbah, ha kaba ïadon ryngkat ki kynrem lyndan na kylleng ka thaiñ Shatei Lammihngi kynthup ïa u Bah Pynïaid Sing Syiem, Chief Executive Member, Khasi Hills Autonomous District Council, u Promod Boro, Chief Executive Member, Bodoland Territorial Council, u Pradyot Manikya Debbarma, Chairman Arc, Tripra TAADC, u Puma Chandra Jamatia, Chief Executive Member, TTAADC, u M Laikaw, Chief Executive Member, Mara Autonomous District Council, u Tuliram Ronghang, Chief Executive Member, Karbi Anglong Autonomous District Council, u C Lalmuanthanga, Chief Executive Member, Lai Autonomous District Council, Rasik Mohan Chakma, Chief Executive Member, Chakma Autonomous District Council, Bah Thombor Shiwat, Chief Executive Member, Jaiñtia Hills Autonomous District Council, u Albinus Marak, Chief Executive Member, Garo Hills Autonomous District Council, Bah Lamphrang Blah, Chairman, Khasi Hills Autonomous District Council, Bah Pynshngaiñlang Syiem, Deputy Chief Executive Member, Khasi Hills Autonomous District Council, Bah Charles Marngar, Deputy Chairman, Khasi Hills Autonomous District Council, Bah Totosstar Well Chyne, Leader of Opposition, KHADC bad kiwei ki ophisar na ki District Council kane ka thaiñ shatei Lammihngi (North East India).
Ka kot ba la thoh da u Bah Raphael Warjri ka dei kaba la tih sani da ki bun phew snem bad tohkit ruh ïa ka dustur kheiñjait na ka kmie ha satlak pyrthei bad kynthoh ha ki jingjia kiba ïai jia ha ka imlang sahlang ba man la ka sngi. Kane ka kot ba la pynmih da ka Riti Academy ryngkat bad ka (INTACH) Indian National Trust for Arts and Cultural Heritage, Meghalaya Chapter ka dei kaba la thwet bniah katkum ka stad maïan ka juk mynta ha kaba ïadei bad ka dustur shim jait na ka kmie. Ka rong ka taw ba la pyllait ïa ka kot ka dei ruh shi bynta na kaba plie paidbah ïa u motsahnam jong u Rev J J M Nichols Roy ba la pynïeng ha Lariti International Cultural and Performing Arts Centre. La tei ïa u mot da ka KHADC ban rakhe sahnam ïa ki kam radbah jong u Rev J J M Nichols Roy kum u nongmaitphang bad nongthaw ïa ka Khyrnit Bahynriew jong ka Riti Synshar ka Ri India.
