Shillong, Nailar 10: Kum shi bynta ban rakhe ïa ka jingdap 10 snem jong ka HYC Mawlai Circle, ha ka sngi Saitjaiñ ka lah pynlong ïa ka prokram jingïaid paidbah halor ka phang ban pyrshah ïa u drok ne ka “Rally Against Drug Abuse”. Ïa kane ka jingïaid lah sdang nakhmat ka Skul Basic na Mawlai Nongkwar lyngba ka Mawlai Phudmuri (Stand Bus) bad pynkut ha Mawlai Madanheh.
Ha kane ka jingïaid paidbah la wan ban ïa shim bynta da ki khynnah skul bad ki Nonghikai jong ki skul bapher bapher kiba don hapoh Mawlai, ki Nongïalam Shnong bad Riew paidbah ka Shnong Mawlai, ki dkhot ka Seng, ki pulit na Mawlai PS bad kiwei kiwei. Ha shi lynter kane ka jingïaid lah ïohsngew ïa ki jingpyrta da ki nongïashim bynta ïa ki kyntien “Ong Em ïa u droks”, ” Say No to Drugs”, ” ki Skul ha Mawlai, ki ong Em ïa u Droks”, ” Ki Nong Mawlai ki ong Em ïa u drok”, “U Droks u Pynkordit” bad kiwei kiwei, ha ryngkat ki placard ban khot ban wer bad kyntu ïa baroh ki nongshong shnong ba kin kiar na ki drok ba bun jait.
Ha ka prokram lyngkot ha Madan Heh lah ïoh ki jingkren na u Bah Donboklang Kharlyngdoh, President Mawlai Circle, u Bah Samual Biam, President Seng Samla Mawlai Pyllun, Bah Arup Passah, u samla ba lah ju ngop ha ki jingdih drok bad na u President ka HYC u Bah Roy Kupar Synrem.
Lah don ruh ka jingïakob Poster Campaign bad short speech halor u drok ha kaba ki khynnah na ki skul bapher bapher ki lah ïashim bynta shitrhem bad ki nongjop ki lah ïoh ruh ïa ki khusnam na ka seng ïa kaba lah sam ha katei ka prokram.
