Shillong, Risaw, 26: Ki nonghikai skul Adhoc kiba don hapoh ka shatri jong ka Federation of All Meghalaya Adhoc Secondary School Teachers Association (FAMASSTA) ki la rai ban ‘boycott’ ïa ki jingbynshet kam lada ka Sorkar Jylla ka dang ïai leh mynthi ha kaba ïadei bad ki mat jingdawa jong ka seng.
Ka President jong ka FAMASSTA ka Kong Bina Kharumnuid ha ka jingïakren bad ki lad pathai khubor ha ka sngi Saitjaiñ ka la ïathuh ba ka jingïalang kaba la long ha kane ka sngi ha Garo Union Higher Secondary School, Bishop Cotton Road, Shillong ka la rai ban ym leit shuh ban leh ïa ka jingpynbeit ïa ki jubab eksamin, ka jinglum khanasamari bad kiwei kiwei ruh ki kam ba ju bynshet da ka Sorkar ïa ki skul kiba ju ïoh jingïarap na ka Sorkar.
“Ngim kwah shuh ban khot ïa ngi kum ki nonghikai skul Adhoc hynrei ngi kwah ban khot noh ïa ngi kum ki nonghikai ba ïoh jingïarap na ka Sorkar kaba duna tam ka jingïoh tulop kaba 29 hajar shi bnai. Naduh u snem 1998 ba la thaw ïa ka Association la pynkiew tulop hadien ba ngi la kyrpad ïa ka Sorkar, hynrei lada ngi peit ïa ka jingkiewdor jong ki marbam mardih kumba ka long mynta, kumno, ma ngi ki nonghikai ngin bsa ïa ka ing ka sem tang da ka tulop kaba T.29 hajar shi bnai,” la ong ka Kong Kharumnuid.
“Ka jingïalang ka la rai, lada ka Sorkar kam sngap ïa ka jingdawa (ban kyntiew tulop) ngi la rai ba baroh ki jingbynshet kam da ka Sorkar kum ka jingpynbeit jubab eksamin, ka jinglum khanasamari, ka kam pynïaid ilekshon, ngin hap ban boycott noh namarba lada ka Sorkar ka kheiñ khunruit ïa ngi, ka eh ïa ngi ban shu kohnguh sneng than,” la ong ka President jong ka FAMASSTA.
“Lada ka Sorkar ka ai jubab hapoh lai bnai, kin sa don ki jingkylla,” ka la bynrap.
“La palat 24 snem ba ngi la thaw ïa ka seng, ngim ju kwah ban mih sha surok ban leit thad sha madan ïa ka kam ba donburom jong ngi, hynrei lada ka Sorkar ka pyneh ngim tip lashai kaei kaba ban jia,” la pynpaw ka Kong Kharumnuid.
Ka la ong ruh ba ka Seng ka ju ïatreilang bad ka Sorkar ha kiba bun ki liang bad ka seng ka kwah ban sngewthuh lem ïa ka jingeh jong ki nonghikai.
