Shillong, Lber, 24: Hadien ka jingud jingnam jong ki nongrep halor ka jingpynslem jong ka Sorkar Jylla ban pyllait ia ki lad jingiarap sha ki nongrep kiba la shah mad ia ki jingshah pynjulor ki lyngkha rep bad kumjuh ki jingthung jingtep na ka jingwan lynshopjong ki bor ka mariang na ka liang jong ki nongialam ka Hills Farmer Union (HFU) ki la leit ban iakynduh ia ki ophisar jong ka tnat Revenue ban iakren halor kane ka mat ha kaba la lap ruh ba ki don ki nongrep ki bym pat ïoh ia ki jingiarap wat hadien lai snem.
Haba iakren ha ki lad pathai khubor, u President jong ka Union u Bah Commander Shangpliang u la ong hadien ka jingiakren bad ka iamir jingmut bad ki ophisar la sngewthuh ba ki don shibun ki bynta ba ka Sorkar ka hap ban pynbiang khamtam eh ha kaba iadei bad ki kot ki sla ban iaid katkum ka rukom ba dei ban leh bad nalor kata ka dang donkam ruh ka jingmynjur jong ka State Executive Committee hashwa ban phah sha ki Deputy Commissioner ba kin pyllait ia ka pisa.
