Shillong, Lber 28: U Myntri Rangbah ka Jylla Assam Himanta Biswa Sarma ha ka sngi Thohdieng u la ong ba ka jylla Assam bad ka Meghalaya ki la kloi ban ïapynbeit noh ïa ki jaka ba dang sahteng ha ka jingïakajia pud kham kloi katba lah.
Katkum ka jingong jong u, lai tylli na ki hynriew tylli ki jaka kiba don hapdeng ka jingïakajia pud ki dei kiba suk ban ïapynbeit noh ha kano kano ka por.
Ha ka jngïakren bad ki lad pathai khubor hadien ba la kut ka passing out parade kaba la long ha NEPA, u Sarma u la ong, “na ka liang jong ka Assam, ngi long kiba kloi ban ïapynbeit noh ïa ki jaka kiba don hapdeng ka jingïakajia pud bad na kita, ha ka jingshisha lai tylli ki dei kiba ngi lah ban ïapynbeit noh ha kano kano ka por. Nga ngeit ba ka Meghalaya ka dang ap ban ïohi ban ïohi ba sa lai tylli yn lah ban ïa pynbeit ryngkat lang. Ngi dang ïaid shakhmat bad ngin ïai bteng ïa ka kam bad nga ngeit ba ka kam kan long da ka jingïasngewthuh jingmut lang.”
Haba kylli, u la ong, “ha ka jingïapynbeit pud ngin hap ban sngap lang ïa ka jingsngew jong ki paidbah na baroh ar tylli ki jylla bad ha kajuh ka por ngi kyrmen ba ngin sa lah ban ïapynbeit noh kham kloi,” u la bynrap.
U Sarma u la ong shuh shuh ba ka Survey of India ka dang ïaid shakhmat ban ruid dak ïa u pud u sam. “Kaei kaba ngi la ïasoi ïa ka soskular hakhmat u Myntri ka tnat Kam Pohing ka ri ka long ban tehsong ïa ki ar tylli ki sorkar,’ u la bynrap shuh shuh.
