Shillong, Nohprah, 12: Ki Pulit jong ka West Khasi Hills District ha ka sngi Baar ki la synran ïa ka kynhun ki Pulit ka Crime Scene Unit bad ïa ka kynhun K-9 Unit Dog Squad kiba la hiar sha Mynniar ka jaka ba la jia ka jingshah shoh bad shah lute ia ki ar ngut ki nonghikai ka Rangsapara Secondary School kaba la jia ha ka janmiet jong ka Lah Sngi u Blei.
Hadien ba ki Pulit ki la pyndep nadong shadong ha kaba ïadei bad ka jingtohkit ha kane ka jaka ki la rah noh ïa ka met ba dang sah jong u T.R Sangma u nonghikai uba la khlad noh hashen ha ka jingshah thombor ha ki runar bad ban leh ïa ka Post Mortem.
Ki Pulit ki la lap ruh ïa ka thuk thuk ba la pyndonkam da kine ki arngut ki nonghikai kaba la kyllon harud surok.
Haduh mynta ki Pulit ki dang pynlong ïa ka jingtohkit kaba bniah bha halor kane ka jingjia bad ban thwet tyngeh ïa ki runar kiba donkti ha ka kam lute bad ka kam pynïap briew.
U Tengton R. Sangma u dei u Headmaster jong kawei ka skul Upper Primary kaba don ha ka shnong Rangsahpara.
La iathuh ba kane ka la jia ha ka por kumba 3. 30 baje eiei nohphai sngi katba kine ki arngut ki dang wan phai na Nongstoiñ bad da ka thuk thuk ar shaka kaba don ïa u nombar AS 25 E 1324 bad ynda la poi ha kawei ka jaka kaba long khongdong kaba jngai kumba 32 kilomitar na Nongstoiñ kaba dei ka surok na Rwiang sha Langpih ki runar kiba la ap ktem lypa ki la khang lynti ia kine ki arngut bad ki la bom la tied ïa kine ki arngut ha kaba u S.R Chetri u la mynsaw jur bad u la lait phet da ka said katba u Tengton R Sangma pat u la khlad noh hadien.
Ki runar hadien ba ki ladep bom, ki la patan ïa ka met jong u Tengton sha khlaw ki la khynñiat ïa ka motorbike sharud surok.
Ha kaba ïadei bad kane ka jingjia, la ong ba hadien katto kane por ba kine ki arngut ki la ngat ha kane ka apot la wan poi kawei ka Bus bad ki briew kiba don hapoh ka Bus ki la pyntip mar mar sha ki nongshong shnong sha Nonglang ha kaba ki la wan poi ha katei ka jaka bad ki la pyntip noh sha ki Pulit.
Nalor kata ki la pyntip ruh sha ki nongtrei jong Nonglang PHC bad ka kali kit nongpang na kane ka PHC ka la leit buh ïa u Chetri uba mynsaw sha Nongstoiñ Civil Hospital hynrei na ka daw ba u la shitom jur palat la pynkit noh ïa u sha Civil Hospital, Shillong .
Ha kaba ïadei bad kane ka jingjia u Supritendent of Police jong ka West Khasi Hills u Bikram Marak ryngkat bad ki Pulit jong ka Crime Scene Unit na Shillong ba la don ryngkat ruh da ki Pulit jong ka Langpih Border Out Post kiba la don lypa naduh mynmiet ha Mynniar ki la pynlong ka jingtohkit kaba bniah ha kane ka jaka ba don ka met ïap ha kaba ki la lap lai tylli ki nar rod ba ki runar ki la pyndonkam ban bom ban tied ïa ki arngut ki nonghikai.
Hadien ba la pyndep nadong shadong ia ki jingtohkit, ki Pulit ki la kurup noh ïa ki nar rod bad ïa ka met ïap jong uba la khladnoh, la pynkit noh sha Nongstoiñ Civil Hospital ban pyndep ïa ka Post Mortem bad hadien ba la dep ïa ka Post Mortem la aiti noh ïa ka met sha ki bahaïng ban pyndep ia ka jinglehniam kaba khatduh.
Ki pulit ki la register case halor kane ka jingjia bad jingtohkit ban lap dien ïa ki runar kiba don kti ha kane ka kam runar ka la ïaid shakhmat.
