Shillong, Nohprah, 12: U MLA jong ka Voice of the People Party (VPP) na ka North Shillong Constituency Bah Adelbert Nongrum u la pynphai nia ia ka jingkynthoh jong u Bah Vivan G. Kynta, uba dei u Senior Lawyer da kaba ong ba u paidbah hi un sa bishar mano ba batai stad bad mano ba balain.
Ha u kyrwoh ba la phah sha ki lad pathai khubor ha ka sngi baar, u Bah Adelbert Nongrum u la ong, “ka jingkren jong u Bah Vivan G. Kynta, ba don kiba balain bad kiba batai stad, nga kwah ban ong, u paidbah un sa bishar, mano ba batai stad bad mano ba balain.”
“Nga ong ia phi, muktiar badonburom, ynnai sngew stad bad ym donkam hi ruh ban phin hikai skul, ngi tip bha kaei ka Land Transfer Act haei ka treikam bad haei kam treikam. Hynrei kam mut ba ki kyntien jong phi ka pynshlur ia ka Sorkar, ba dei ka Non-Schedule Area bad ka European Ward ka sorkar kan leh katba mon hynrei ka dei (ka nongkynti) jong u paidbah bad kan ym lah ban leh katba mon. Bishar paidbah shwa ban shim ia ka rai,” la ong u Bah Nongrum.
Haba kynthoh halor ka jingong jong u Bah Kynta ban pyntreikam da ka aiñ MPDA, u Bah Nongrum u la ong, “phi tip bha bad ngi tip bha kaei ka aiñ MPDA bad kumno ka treikam. Hynrei ngan ong, yn ym don aiñ ha pyrthei ban iada ia phi Muktiar. Wat ym long ka daw ba phin long ka daw ban thang ia u kyndok jingpruid.”
