Shillong, Nailar 23: Iwei i khynnah skul iba dang pule ha ka Class KG ha Laitumkhrah Presbyterian Higher Secondary School, Shillong i la lait thaw na ka tyrsim jong ki nongrah bor bar jylla kiba la leit pan jingbit na ka Principal jong ka skul ban pyllait noh ia i da kaba shu thok shu lamler ba ka kmie jong ine i heprit ka don hapdeng ka jingshitom.
Katkum ka tyllong khubor ba la ioh na ki Pulit, la iathuh ba ha ka por 3.30 baje nohphai sngi, ki Pulit ki la ioh jingtip na ki kmie ki kpa jong ine i khynnah skul ba ha ka 23 tarik u Nailar, 2023 ha ka por kumba 12.30 baje nohphai sngi, arngut ki briew kiba dei ki bar jylla ki la rung Laitumkhrah Presbyterian Higher Secondary School ban pan jingbit na ka Principal ban ialam noh ia ine i khynnah sha ing da kaba aidaw ba ka kmie ka la phah leit shaw noh namar ba ka don hapdeng ka jingshitom.
Shuh shuh la iathuh ba ka Prinicipal bad ka Nonghikai kim shym la pyllait satia ia ine i khynnah namarba kim shym la ithuh satia ia kine ki arngut ki bar jylla.
Mar mar ki bor pyniaid skul ki la telephone sha ka kmie jong ine i khynnah ban phah shaw noh ia ine i khun jong ka.
Ka tyllong khubor ka iathuh ruh ba mynta hi ka sngi, ki bor pyniaid skul ki la iathuh uwei khynnah skul uba dang pule ha ka Class-6 u lait phet da ka said na ka kti jong ki runar kiba la thmu ban rahbor ia u katba u dang leit phai sha la ing.
Halor kane ka jingjia, ki Pulit ki la pynlong ka jingtohkit bad ka jingthwet kaba jur ban iohkem ia ki runar kiba donkti.
