PAN JINGPYNSHAI KA KSU NA KA HEALTH DEPARTMENT
Shillong, Nailar 23: Ka Khasi Students Union (KSU) ka la pan jingpynshai na ka tnat ka Koit ka Khiah jong ka Sorkar Jylla ha kaba iadei bad ka bhah pule MBBS jong ka Jylla Meghalaya lyngba ka State Quota.
“Ka KSU ka la ioh jingtip ha kaba iadei bad ka bhah pule MBBS jong ka jylla Meghalaya lyngba ka State Quota, la don bun kiwei pat ki jaidbynriew kiba ioh rung ha ka Open Category. Na ki 14 ngut kiba la shah jied ban leh Screening, don tang lai ngut ki trai ri lane ki riewlum katba 11 ngut pat ki dei na kiwei pat ki jaidbynriew bym dei riewlum,” la ong ka seng ha u kyrwoh ba la phah sha ki lad pathai khubor ha ka sngi Balang.
“Ka seng ka la ioh jingujor ruh ba lehse kitei ki 11 ngut kim dei na ka jylla Meghalaya hynrei ki dei ba na jylla Assam. La don jingsuba ruh ba ki ioh ia ki kot ki sla na ka shnong Ampati, South West Garo Hills. Halor kane ka kynrum kynram, ka KSU ka pan jingpynshai na ka Sorkar Jylla hato kitei haneng ki dei kiba shisha ne kumno. Ka KSU ka dawa ruh ba ka Sorkar Jylla ka dei ban pyni paidbah ia ki Aadhar Card bad EPIC jong kitei ki 11 ngut la ki dei neem ki nong Meghalaya bad kumjuh ruh na ki kolej aiu ba ki pyndep ia la ki jingpule,” la dawa ka KSU.
“Ka Open Category ka dei na ka bynta baroh ki nong Meghalaya kynthup ruh ia ki Scheduled Tribes ka jylla bad bunsien, bun ngut ki Khasi ki ju ioh ban rung ha kane ka thup kaba plie lad plie lynti pat ia ki kiwei ki para Khasi ban rung na ka Khasi-Jaiñtia Category. Katei ka jingioh rung khlieh da ki samla pule ba suba ba dei na shabar ka jylla kan pynduh lad ia 11 ngut pat ki samla Khasi bad Garo kiba thrang ban ioh pule MBBS,” la ong ka Seng.
“Sa kawei pat ka mat kaba ktah jur bha ia ka jylla bad khamtam ia ki samla ba dang shu dep pule Medical kiba dei na jylla ka dei halor ka jingkhot ia ka Walk-in-Interview da ka Sorkar Jylla ia 170 ki kam Contractual kiba dei ia ki post Medical & Health Officer (70 tylli) bad ki post Specialists (100 tylli). Ka seng ka sngew namarba ki dei ki kam kiba hap hapoh ka Sorkar Meghalaya kumta ka dei ban plie lad shwa ia ki trai shnong ka jylla ym ban plie kyllum lang ia baroh ki nong India bad ia kito kiba na ka thaiñ Shatei Lammihngi,” la dawa ka Seng.
“Ka seng ka la buh jingkylli hato balei ym ailad ban long da ka eksam ban pyniaid da ka Meghalaya Medical Recruitment Board? Ki don bun ngut ki samla na jylla kiba la pyndep ia la ki jingpule ha ka laiñ Medical bad katei ka jinglait haduh 170 tylli ki kam kan ailad ia ki ban thep ia kitei ki kam lada mang beit tang ia ki nong Meghalaya hynrei sngew thamula ba ka Sorkar Jylla ka plie pynban ia ka lad aikam aijam sha baroh ki nong India. Hato ka Health Department jong ka jylla Meghalaya ka dei jong ka Jylla ne ka dei ka tnad Sorkar Pdeng? Ka KSU ka dawa na ka Sorkar ba ka dei ban pynbeit mar mar ia kane ka kam bad kyntu ia ka ba ka dei ban long ka nongaikam ia ki trai Jylla ym ia ki Bar Jylla,” la ong shuh shuh ka Seng.
