Shillong, Nailar, 09: Ka Hynniewtrep Youth Council (HYC) ha ka sngi Thohdieng ka la dawa ba dei ban pynkynriah noh ïa ka Opioid Substitution Therapy (OST) Centre na Shillong Civil Hospital hapoh 7 sngi hadien ba ki dkhot jong ka seng ki la sakhi da la ki jong ki khmat ïa ki nongdie bad ki nongdih drok kiba ïaid sahuh ha phyllaw jong kane ka Hospital.
Tang hapoh khyndiat kynta ba la lap ïa kane ka jingisaitmet na ka jingdon jong ki nongdie bad ki nongdih drok ha phyllaw jong kane ka Hospital kaba don ha dohnud jong ka sor Shillong, mar mar, ki nongïalam jong ka seng ki la leit ban aiti da ka jingthoh sha ka Director of Health Services (MI), Shillong.
U President ka HYC u Bah Roy Kupar Synrem ha ka jingïakren bad ki lad pathai khubor u la ong, ka Council ka la ïoh pdiang ruh ïa ki jingujor na ki riewpaidbah, na ki nongtrei jong ka Hospital bad na ki nongpang halor ka jingdon jong ki briew kiba ju mlien ban dih drok hakhmat ka OST Centre kaba don ha phyllaw jong ka Hospital.
Kine ki briew ki ju donkti ban rung shapoh ki kamra thiah jong ki nongpang ban tuh ïa ki tiar ki tar bad ki ju shong ruh ha mawkyndon ban rung shapoh ka hospital da kaba pynwit ïa ka ïaid ka ieng jong ki nongshim dawai bad ki nongap pang bad kren ruh da ki ktien kiba sniew laiphew jait ynda ki la buaid Ganja bad buaid drok.
“Mynta ka sngi, kum ka seng ngi la pynlong ka jingtohkit hadien ba ngi la ïoh pdiang ïa kine ki jingujor bad ngi la ïohbat ruh ïa ki briew kiba ju mlien ban tamti ïa ki tiar ki tar napoh ka hospital bad ngi la ïoh kurup ruh ïa u drok bym pat pyndonkam ba la thep ha ki tyndong plastik barit bad ïa ki mobile phone. Kine ki briew, ynda ngi la tohkit, ki la phla ba ki dei kiba la im kyrni ha u drok bad ki dei kiba ju leit shim dawai khah khah na OST Centre. Ngi la lap tyngkreiñ ruh ba hakhmat ka OST Centre ka dei ka jaka kaba kine ki briew ki ju smat bha ban ïalum briew bad ban leh ki kam be-aiñ. Kine ki briew ki ju long ki mawjynthud ïa ki nongpang, ïa ki nongap pang bad ïa ki nongtrei jong ka Hospital,” la ïathuh u Bah Synrem.
“Namarkata, ngi kyrpad ba dei ban pynkynriah noh mardor ïa ka OST Centre sha ki jaka kiba kham shngaiñ, ym ha ki jaka ba ju rung ju mih ki riewpaidbah. Ngi ngeit ba kane kan ïada ïa ki nongpang bad ïa ki nongtrei ba kin dup lah ban pyntyllun kham bha ïa ka kam ba ki ai jingshakri,” la ong u Bah Synrem.
“Ngi kyrpad ba dei ban leh noh mardor ïa kane ka kam hapoh shitaiew. Lada hapoh shitaiew ngim ïohi kam eiei, ngim banse ban shim da kiwei pat ki lad ki lynti kiba kham tyngeh,” la maham u Bah Synrem.
