Shillong, Nailar, 09: Ka Meghalaya Board of School Education (MBOSE) nangne shakhmat kan sa pynlong noh ar tylli ki eksamin Secondary School Leaving Certificate (SSLC) ka ban sdang naduh u snem 2025.
Kane ka jingthmu ka long ban ailad ïa ki khynnah skul ba kin ïohlad ban thoh biang ha ka wat kaba ar ha ka eksamin hapoh ar bnai hadien ba ki la phiel ïa ka eksamin.
Ïa kane ka rai jong ka tnat Pule Puthi da kaba pynbeit thymmai ïa ka Meghalaya Board of School Education Regulation for Secondary School Leaving Certificate Examination, 2011 la mynjur da ka jingïalang jong ka Kynhun Myntri ba la pynïaid da u Myntri Rangbah ka Jylla u Conrad K Sangma ha ka sngi Thohdieng.
“(Da kane ka rai), ka MBOSE mynta kan sa don noh ar tylli ki eksamin jong ka Board ka ban sdang naduh ka Academic Year 2025 shakhmat,” la ïathuh u Myntri ka tnat Pule Puthi jong ka Sorkar Jylla u Rakkam A Sangma haba kren sha ki lad pathai khubor hadien ba la wai ka jingïalang.
“Ka eksamin banyngkong jong ka Board kan sa long ha u bnai Rymphang ne ha ka taiew banyngkong jong u Lber bad ka eksamin kaba ar kan sa long pat na ka bynta kito kiba phiel ha baroh ki sobjek ne kiba phiel tang shi sobjek, ar sobjek ne lai sobjek. Yn sa ailad ïa ki khynnah ba kin thoh biang ïa ka eksamin jong ka Board hapoh shi bnai ne ar bnai, kata, hapoh u Jymmang,” u la ong.
Katkum ka jingïathuh jong u Myntri, ka rai jong ka Sorkar ka long kum shi bynta ka jingtreikam ïa ka National Education Policy (NEP).
“La leh ïa kane ban ïarap ïa ki khynnah skul namar ba ïa ka Supplementary Examinations mynta la ju pynlong hadien shi snme hynrei mynta ïa ka Supplementary Examination yn sa pynlong beit hapoh kajuh ka Academic Year khnang ba ki khynnah kiba pule ha ka Class-X kin lait na ka jingduh ei shi snem,” la bynrap u Myntri.
Shuh shuh u Rakkam u la ïathuh, “ban ym pynsepei ïa ka por wad jaka pule jong ki khynnah ha ki snem ki ban sa wan kaba lah ban long naduh ka Academic Year jong u snem 2025-2026, ka eksamin banyngkong jong ka Board kan sa long noh mardor ha u bnai Nohprah, lehse ha ka taiew balai ne ka taiew basaw jong u Nohprah, 2025. Ka eksamin baar jong ka Board kan sa long pat ha u Rymphang ne Lber 2026 hynrei na ka bynta kane ka Academic Year hapoh u bnai Rymphang bad Jymmang yn sa pynlong ïa ki ar tylli ki eksamin jong ka Board.”
U Myntri u la ïathuh ba kan ym don shuh ka Optional Paper ne ka Best of Five naduh ka Acadeimc Year 2026-2027.
“Naduh ka Academic Year 2026-2027 baroh ki khynnah skul ki dei bad kin hap ban pas lut baroh hynriew tylli ki sobjek ha ka eksamin jong ka Board,” u la ong.
