Shillong, Nailar 7: Ka kynhun Search and Rescue Team (SRT) jong ka tnat Fire and Emergency Services (F&ES) Shillong ka la lapdien sa ia u Bah Yomiki Kharshandi uba dang lait im na ka jinghap jong kawei ka trok ha riat Mawkhap, Pynursla Civil Sub-division hadien ba lai ngut ki paralok jong u ki la khladnoh hashen bad uwei pat uba la tip kyrteng kum u Bansiew Khongklian u la lait im da kaba par dohim dohiap na trai jong ka riat haduh ban da poi shajrong surok.
Katkum u kyrwoh ba la phah da u Superintendent of Police ka East Khasi Hills District, u Bah S. Nongtnger la iathuh ba ha ka miet sngi u Blei kawei ka trok kaba don ia u nombar ML05 G 9528 ba la niah da u Yomiki kharshandi, 20 snem ka rta kaba kit 12 tylli ki muid, ka la sniew kynsan tang shu poi ha Langkyrdem katba ka dang wan phai na Pynursla ban leit sha Laitlyngkot.
Ynda la poi ha Khoh-yiar hajan ka khongdong surok ha Mawkhap ha surok National Highway-40, kane ka trok ka la sniew bad tyllun shadien bad hap syndon jraiñ sha riat.
Ki Pulit kiba la ioh jingtip ia kane ka jingjia ki la leit mar mar ban leit ai jingiarap ha kaba la lap ba u Bah Bansiew Khongklian na ka shnong Phlangshlain u la par dohim dohiap na trai ka riat haduh ban da poi tiap shajrong surok katba ia u bah Yomiki kharshandi la lap da ka kynhun SRT ba u dang im bad shu thiah lyngktop hapdeng ka jingmynsaw jong ki kjat.
Lai ngut kiba la khladnoh ha kane ka jinghap jong kane ka trok ki dei kiba la ithuh kyrteng kum u Kyndaiborlang Kurbah na Kseh Mawnai, u Banpeitlang Marbaniang na Nongshken Mawdang bad u Welbokstar Sohlang na Kseh Mawnai.
Ha kaba iadei bad kane ka jingjia ki pulit ki la register case ha Pynursla Police Station.
