Shillong, Jymmang 24: Ki Pulit ka Sadar Police Station ha ka sngi Thohdieng ki la ïoh tam ïa ka shynrong khlieh briew kaba shah rong ha ka um na ka nala ha Oakland Road, Shillong.
Ïa kane ka shynrong khlieh la lap nyngkong da ki nongïaid lynti kiba la pyntip mar mar sha ki Pulit bad kiba leit tohkit bad ban shimti noh ïa kane ka shynrong khlieh ban pynlong ïa ka jingtohkit kaba bniah.
Hadien ba la lap ïa ka shynrong khlieh, ki Pulit ki la lap sa ïa ki shyieng Lbong bad ka Krung na ka nala jong ka shnong Bivar Road, Shillong.
Ia ki lyngkhot met la kitnoh sha NEIGRIHMS ban leh ïa kaba donkam katkum ki kyndon ain.
U Superintendent of Police (SP) ka East Khasi Hills Rituraj Ravi haba pyntip halor kane ka jingjia, u la ong, ïa kane ka shynrong khlieh la lap ha ka 22 tarik Jymmang bad mar mar la pynlong ïa ka jingtohkit bad ka jingwad shuh shuh ïa ki lyngkhot met ha ka thaiñ.
U pyntip ba ha ka sngi kaba bud ka kynhun Pulit ka la ïoh tam pat sa ïa ka shyieng Lbong ba la kem pyut napoh ka nala jong kane hi ka thaiñ bad ha ka 24 tarik pat la lap sa ïa ki shyieng Krung hadien ka jingwad kaba slem bha.
Katkum ka jingiathuh jong u SP, ki Pulit ki suba ba kane ka metiap ka lah ban dei jong u shynrang briew.
Halor kane, ki Pulit ki la register case ha Sadar Police Station hapoh ka kyndon 302 IPC bad ka jingtohkit mynta ka la ïaid shakhmat.
