Shillong, Jymmang, 24: Ha kawei ka jingjia kaba pynsyier mynsiem ia ka imlang ka sahlang, uwei u rangbah uba la 35 snem ka rta ia uba la tip kyrteng kum u Amison Muruh u la shah pyniap ha ka 23 tarik Jymmang ha ka por kumba 7:00 baje janmiet ha la ing sah lajong kaba don ha ka shnong Umtasor Mawdkhar, Ri Bhoi District.
Katkum ka jingtip ba la iohlum la iathuh ba une u rangbah u la shah pyniap da kaba shah thlieh da ka kynja tiar banep nadien ryndang.
U Rangbah Shnong jong ka shnong Umtasor Mawdkhar u bah M. Mukhim, u la iathuh ba u la ioh jingtip halor kane ka jingjia ha ka por 7.30 baje bad mar mar u la pyntip sha ki Pulit jong ka Nongpoh Police Station kiba la wan poi ban pynkit noh ia ka met jong une uba la khladnoh sha Nongpoh Civil Hospital na ka bynta ban leh ia ka post-mortem examination.
Ha kaba iadei bad kane ka jingjia, ki Pulit ki dang pynlong ia ka jingtohkit kaba bniah ban iohkem ia kiba donkti ha kane ka kam bymman.
