Shillong, Lber 28 : Ki Pulit jong ka East Khasi Hills District kiba la pynlong ia ka jingtohkit kaba bniah ki la sdang ban lap ksai ia ki briew kiba donkti ban pyniap ia ki arngut ki bar jylla ha ka shnong Ichamati, kaba hap hapoh ka Sohra Civil Sub-division, East Khasi Hills District.
“Ngi la ioh ksai halor ki katto katne ki briew kiba ngi suba ba ki dei kiba donkti ha ka kam bymman ha ka shnong Ichamati. Hynrei, haduh mynta ngim pat kem satia iano iano ruh. Ngi dang pynlong ia ka jingtohkit kaba bniah ha lyndet ka jingthmu jong kane ka kam bymman,” ong u Superintendent of Police ka East Khasi Hills District u Rituraj Ravi ha u kyrwoh ba la phah sha ki lad pathai khubor ha ka sngi palei.
“Ngi kyntu ia ki paidbah ba kin pynneh ia ka shongsuk shongsaiñ bad ban burom ia ki kyndon jong ka aiñ,” la ong u SP.
Kum ban shu pynkynmaw hangne, ar tylli ki metiap jong bar jylla la lap ha ka janmiet sngi balang ha ka shnong Ichamati bad Dalda kaba hap hapoh ka Shella Police Station, East Khasi Hills District. Kine kiba la shah pyniap ki long u Esan Sing bad u Sujit Dutta bad ia ka met iap jong kine ki arngut la lap na ka shnong Ichamati bad Dalda.
Kane ka la jia ryngkhat ha kane ka sngi ba ka Khasi Students Union (KSU) ka la pynlong ia ka jingialang ha ka por mynsngi ban pyrshah ia ka Citizenship (Amendment) Rule, 2024.
La suba ba ki runar ki la shim kabu ha kane kajuh ka sngi ban dkhat jubor ia ka jingim jong ki arngut ki bar jylla.
Ia ka met jong kine ki arngut la leh ia ka post mortem ha Shillong Civil Hospital ha ka sngi palei.
Ki ar ngut ki para jong ki ar ngut ki bar jylla kiba la shah pyniap ha Ichamati ha ka jingiakren bad ki lad pathai khubor ha ka sngi palei katba ki dang ap ia ka jingleh Post Mortem ha Civil Hospital, Shillong ki la iathuh ba ki la ioh jingtip ia ka jingiaklumar ha iew Ichamati kaba la sdang ha ka por kumba 4:00 baje nohphai sngi hynrei ki la ioh jingtip ia ka jingkhlad kine ki arngut ka dei ha ka por premmiet.
Uwei na ki para jong uba la shah pyniap u la iathuh ba u hymmen jong u, u dei uba ju bylla thep maw bad katba u dang thmu ban wan phai sha la ing bad ha shiteng lynti u la ngat pynban ha ka tyrsim jong ki runar kiba la tangon ia u haduh ba un da iap bad ia ka met jong u la lap narud surok.
Halor kane ka jingjia, ki Pulit ka Sohra bad Shella bad kynthup ruh ki Pulit na Shillong ki la hiar sha ka shnong Ichamati, ka shnong kaba don ha khappud bad ka ri Bangladesh ban pynkhlaiñ ia ka jingpahara bad ban pynneh ia ka shongsuk shongsaiñ.
Kumba ka long mynta, ka jinglong jingman ha ka shnong Ichamati ka la pynsyier mynsiem ia ki nongshong shnong khamtam ia ki bar jylla.
