Shillong, Lber 28 : Ka Executive Committee jong ka Dorbar Shnong bad kiba bun na ki paidbah nongshong shnong jong ka shnong Mawlai Syllaikariah, kaba hap hapoh ka Mawlai Constituency ki la rai ban ‘boycott’ ne ban ym iashim bynta ha ka Elekshon Lok Sabha ka ban sa long ha ka 19 tarik, Iaiong, 2024.
U Rangbah Shnong jong ka Mawlai Syllaikariah Bah C. Shullai ha ka jingiakren bad ki lad pathai khubor ha ka sngi Palei u la iathuh ba ka jingshim rai jong ka Executive Committee jong ka Dorbar Shnong ka long halor ka jingleh mynthi jong ka Sorkar Meghalaya Democratic Alliance (MDA) ka bym shym la sngap ia ka jingkyrpad ban maramot ia ka surok PWD bad ia ki surok shnong bad lynti iaid kjat hapoh ka shnong ba ka tnat PHE ka la tih bad thep ia ki pipe um mynta la shi snem tam.
U la iathuh ba u Additional Chief Engineer jong ka tnat PHE u la wan peit hi dalade bad u la ong ba un sa bthah ia u Kontraktor ban shna noh ia ka surok bad ia ki lynti shnong ba ladep tih hynrei la jan shi snem la shu ieh beit kumto.
“Dang lai bnai duna ngi ladep ai ia ka jingthoh da ka kti ha ka Ophis PHE hynrei ka long kumba ibeiñ ia ka shnong ba ki iehsat kumne,” la iathuh u Bah Shullai.
“Ha u snem 2022 ka tnat PHE ka la wan buh ia ki pipe um ban ai um ia ka shnong lyngba ka Greater Shillong Water Supply Scheme (GSWSS). Ki la sdang ban tih ia ka surok PWD, ia ka surok shnong bad ia ki lynti iaid kjat naduh u snem 2022 hynrei ynda ladep tih, ki shu ieh noh kumto. Ha ka por ba slap, da ki bnai ngi (hap ban) iaid nalor ka ktieh. Ha ka por ba rang u pumpum u rung sha ki ing jong ki briew,” ong u Bah Shullai.
U la iathuh ba ka Executive Committee jong ka Dorbar Shnong ka la kyrpad ia u Kontraktor ban tap bad ban leh bha noh bad shipor u la sdang ban leh bad u iehnoh bad u la sdang biang bad iehnoh. “Bun ki briew ki la mynsaw ha ka por ktieh ba slap. Ngi la kyrpad rit ia u kontraktor hynrei u shu ong toto bad shu kut tang ka ktien,” la ong u Rangbah Shnong.
“Shipor u la sdang biang (ban trei) bad u la iehnoh shiteng. Ki don ki jaka kiba hap ngi ban shna hi da ka shnong bad ngi la hap ban pynlut da ka pisa shnong kumba 15 hajar haduh 20 hajar ba ki nongleit nongwan kin suk bad ki kali kin suk iaid. Ki don ki jaka ba ki kali kim long shuh wat tang ban iaid,” u la bynrap.
“U Kontraktor u la sdang trei bad la wan noh u slap u iehnoh. Shipor ngi la iaishah namarba la hap u slap bad hadien kata ngi la kyrpad biang ban pyndep noh ia ka kam ba ki paidbah kin suk ka leit ka wanm” u la ong shuh shuh.
Katkum ka jingiathuh jong u Rangbah Shnong, ki don leilei ki jaka ba ki briew haba ki iaid mynmiet ki hap hapoh ki thliew. Ki la don arngut ki khynnah rit kiba hap ha kine ki thliew ki la mynsaw. I don iwei ruh i longkimie ba dang armet i la liat ha kane kajuh ka thliew bad i la mynsaw bad donbok ba dang don kiba lap ban sei ia i na thliew.
“Ha ka khongdong ha lailad, kiba niah Scooty mynmiet ki ur, ki hap bad ki mynsaw bad bun ruh ki Scooty ki la sniew. Ngi la kyrpad ia ka tnat PHE bad ngi la ai ruh da ka jingthoh hynrei kam leh eiei,” u la ong.
“Ngi la khot ia u MLA u ong ba um lah ban leh eiei namarba ka dei ka kam jong ka PHE bad u MDC ruh kumjuh u ong ba dei ka kam jong ka PHE um lah ban leh eiei. Ngi la thoh da ka shithi sha ka tnat PHE ruh ki sngap manman khlem ai jubab haduh mynta,” u la bynrap.
U la iathuh ba ha ka taiew baladep, kum u Rangbah Shnong u la phah noh da ka ujor lyngba ka Public Grievances Complaint sha u Myntri Rangbah ka Jylla hynrei mynta la jan shitaiew ym don satia ba jubab eiei halor kane ka jingai ujor.
“Ym don ba salia haba ngi shem jingeh. Ngim don lad shuh bad ka lad mynta ka long sa tang ba ngin ym iashim bynta shuh ha ka elekshon Lok Sabha namarba ngim i myntoi. Ngi jied ia ki nongmihkhmat ba kin dup lah ban iarap ha ki kam pynroi bad ki jingeh ba ka shnong ka ud ka nam ban pynsngerw sha ka Sorkar hynrei ka shu kut noh kumto,” ong u Bah Shullai.
“Haba ngi jied ia ki nongmihkhmat ngi mut ba kin mihkhmkat ia ngi ki paidbah bad ban rah ia ki jingeh jong ngi sha ka Sorkar pynban ngi sngew ba kam don jingmyntoi,” la kren diaw u Bah Shullai.
“Ka Executive Committee ka la rai ba ngin ym iashim bynta ha ka elekshon Lok Sbha namarba ka Sorkar kam leh eiei. Kam don jingmyntoi lada ngi thep vote. Bun ki nongshong shnong ki ong ba ngin ym thep vote. Hynrei ka shong pat ka mon shimet jong kito kiba kwah ban thep vote hynrei kiba bun hi ki ong ban ym thep vote,”la iathuh u Bah Shullai haba pyntip ia ka jingshim rai jong ka Dorbar Shnong bad ki paidbah nongshong shnong.
“Ngin ym shim jingkitkhlieh shuh ban pyniaid beit iaid ryntih ia ki Polling Station bad ngin ieh beit ba ka Sorkar kan leh katba ka sngewbit hynrei ka shnong kam don jingkitkhlieh. Lada ka Sorkar kam iohi bad kam shimkhia ia kane ka jingeh kaba ngi la pynpaw shwa ka Elekshon MP ngi kum ka shnong ngin ym iashim bynta eiei,” la bynrap shuh shuh u Bah Shullai.
Katkum ka jingiathuh jong u Rangbah Shnong, ki nongthep vote ha ka shnong Mawlai Syllaikariah ki don 1500 ngut bad lah ruh ban tam namarba ki don kiba dang shu pynrung kyrteng thymmai ha ka Electoral Roll.
