Nongstoiñ, Jymmang, 14: Uwei u samla na ka thaiñ nongstoiñ u bym shym la kwah ban pynpaw kyrteng ne pyni durkhmat u la pynpaw ïa ka jingsngewsih kaba jur halor ka jingbym shimkhia bad kheiñ snep jong ki Technician kiba dei peit ïa ka E-ray bad kiwei hapoh ka Nongstoiñ Civil Hospital ïa la ka kam ban wan shapoh hospital ha don ki jingjia ba kyrkieh.
Une u samla u la phla ba ha ka 12 tarik mynta u bnai u la ïakynduh ïa ka jingjia aksiden kali ha ka surokbah Nongstoiñ-Riangdo ha kaba la pynkit noh marmar ïa u sha ka Nongstoiñ Civil Hospital bad u la ong ruh ba ki doktor ki la ïaleh shitom ban ai jingsumar kyrkieh ïa u, hynrei kaba sngewsih ka long ba ha kane hi ka sngi ki nongtrei kiba dei peit ïa ki kor E-ray kim shym la don hapoh ka Hospital bad na ka liang jong ki doktor ki la telephone ban phah wan ïa ki nongtrei hynrei naduh ka por 1:00 baje noh sngi haduh ka por 4 baje janmiet kim shym la poi satia bad ki doktor kim banse ban phah noh ïa une u samla sha Shillong ban ïoh ka jingsumar kaba paka.
Une u samla u la kyntu ruh ïa ki bor bahalor jong ka Nongstoiñ Civil Hospital ba kin kitkhia bad leh eiei pyrshah ïa ki nongtrei ki bym kheiñ snep ia la ka kam khnang ban lait na kino kino ki jingjia kiba sngewsih ïa ki briew bad ia ki nongpang khamtam ïa ki duk ki suk.
