MAHAM ÏA KI TROK KIT DEWÏONG/MAWSHUN BA KIT PALAT PUD
Jowai, Jymmang, 14: Ka Joint Action Committee Namchiang Narpuh (Tongseng shaduh Ratacherra), East Jaintia Hills, ka la pynpaw ia ka jingsngewkhia kaba jur halor ka jingleh kuman jong ka National Highway Authority of India (NHAI) ban maramot ia ka surokbah National Highway-6 kumba ka la kular.
U Chairman jong ka JAC u Bah Lasting Pala ha u kyrwoh ba la phah sha ki lad pathai khubor u la ong, “ka jingbym leh eiei jong ka Sorkar ban pynbha ia ka surok ka la pynjynjar ia ki nongleit nongwan namarba ka jingsniew jong ka surok ka la long shaba palat pud.”
“Kaba sngewthamula ka long ba ka NHAI ka siang rong tang ha ki bynta jong ka surok ba dang bha bad ieh pat ia ki thliew ki syiar ha shilynter jong surok. Kane ka jingleh kane ka NHAI ka long tang ban ioh sei ia ka pisa (bill),” la kynnoh ka JAC.
“Bunsien ki paidbah nongleit nongwan khamtam ki bapang ba shitom ki sahkut ha ka dheng kali ha ka thain Tongseng shaduh Umkiang, Ratacherra khamtam ha ki bynta jong ka Mandir da ki bun bun kynta. Ka jingdheng kali ka dei na ka daw ka jingiaid jong ki kali kit mawshun, kali kit dewiong kiba kit palat pud bad dei kine kiba long daw jong ka dheng kali ha shilynter jong ka surok NH-6,” la ong ka JAC.
“Ka JAC ka kyntu ia ka Sorkar/NHAI ban maramot noh ia ka surok NH-6 hapoh shitiew hynrei lym kumta ka JAC kan lum paidbah ha surok bad ban pakhang syndon ia ka surok,” la maham ka JAC.
“Ka JAC ka la maham ruh ia ki trok ki dewiong/mawshun ba kim dei ban pynkheiñ ia ka hukum ba la pynjari da ka Ingbishar Supreme Court da kaba kit palat pud nangne shakhmat. Lada ka JAC ka lap ia ki trok kiba kit palat pud kan shim ia ka sienjam da kaba mih paitbah ban kem naphang ia ki trok kit dewiong/mawshun kiba pynkhein aiñ bad ban aiti syndon ia ki sha ka bor jong ka aiñ ne wat ban ujor da ka ejahar,” la byrngem ka JAC.
