Shillong, Nailur, 27: U Jagadguru Shankaracharya Swami Avimukteshwaranand Saraswati un sa wan poi ha Shillong Airport da ka liengsuiñ barit ha ka sngi Saitjaiñ. Ka jingthmu ban wan sha Shillong ka long ban ïalap ïa ka jingkhnang shoh doh ïa ka masi.
Haba pyntip ïa kane ha ka sngi Thohdieng, u National Media Coordinator u Shailendra Yogiraj Sarkar u la ong, “un (Avimukteshwaranand) sa wan poi ha kad liengsuiñ ha ka por 12 baje mynsngi bad un sa sieh ïa ka lama masi ha ka por mynstep ban pynlong ïa ka Gau Dhwaj Sthapana Bharat Yatra, na ka bynta ban pynbna ïa ka masi kum ka kmie jong ka ri bad ban wanrah ïa ka aiñ da ka Sorkar India ban khang noh ïa ka jingpynïap ïa ka masi.”
Shwa ha kane ka sngi, ki dkhot jong ka Khasi Students’ Union (KSU), ka Hynñiewtrep Youth Council (HYC) bad ka Hynñiewtrep Integrated Territorial Organisation (HITO) ki la hiar sha Shillong Airport ha ka shnong Umroi ban pyrshah ïa ka jingwan jong u Avimukteshwaranand sha Shillong na ka bynta ban pynlong ïa ka jingïaid paidbah ne ka Yatra.
Ka jingleit pyrshah jong kine ki kynhun ka long halor ka jingïoh jingtip ba u Avimukteshwaranand un wan poi ha kad liengsuiñ ha ka por 12 baje shiteng sngi (ha ka sngi Thohdieng). Hadien ba la ap jin ar kynta, la pyntip sha ki dkhot jong kine ki seng ba la pynkynriah noh ïa ka jingwan jong u Avimukteshwaranand sha ka sngi Saitjaiñ.
U President ka HYC u Bah Roy Kupar Synrem u la ong ba ki dkhot jong ka seng kin sa leit biang ban pyrshah lashai ka sngi ha Kad Liengsuiñ Shillong, ban pynthikna ba kum kine ki briew ym dei satia ban ailad ba kin wan iuhkjat ha kane ka jylla.
“Ngin sa pynthikna ba kane ka jingwan jong ki sha Meghalaya kan kut tang ha kad liengsuiñ,” u la ong bad bynrap, “ngi ym ailad satia ïa ki ban wan hangne bad ban batai stad kumno ngin im bad ïa kaei ngin bam. Kumba la leh ha ka jylla Arunachal Pradesh bad ha Nagaland, ma ngi ruh, ngin ym ailad ïa ki ban wan rung sha kane ka jylla jong ngi.”
“Lada ki bor synshar district lane ka sorkar ki shah kum ïa kine ki briew ban wan sha Shillong, ngi long kiba la khreh ban pyni da ka bor bad ki Deputy Commissioner jong ka Ri Bhoi bad ka East Khasi Hills ryngkat bad ka Sorkar ba la lamkhmat da u Conrad K. Sangma kin hap ban shim hi ïa ka jingkitkhlieh lada mih kano kano ka jingthud ha ka shongsuk shongsaiñ,” la maham u Bah Synrem.
