Shillong, Jylliew 25: Ki nongïalam ka HYC Sohïong Zone hapoh ka jingïalam u Bah Purning Star Shabong, ki la shah khot hajir ha ki Pulit jong ka Sadar Police Station ha ka sngi Baar.
Ki nongïalam ka Seng hadien ba ki la mih na thanad, ki la ïathuh ba ka daw ba ki la shah khot hajir ka dei halor ka jingmudui ejahar da uwei u rangbah uba la aikam ïa ki bar jylla ban trei ha Sohïong, namarba ki dkhot jong ka Seng ki la leit ban khynra ïa kine ki nongbylla ki bym don ia ki kot ki sla kiba biang bad kiba ym shym la ïoh jingbit na ki bor synshar shnong.
U Bah Shabong, u la ïathuh ba ha kane ka ejahar la kynnoh ruh ba ki dkhot jong ka HYC ki la shoh la dat ïa kine ki bar jylla.
Hynrei u Bah Purning u la ïathuh ba ki dkhot jong ka seng kim shym la ktah kti ïa ki nongbylla bar jylla hynrei ki la leit tang ban talasi ïa ki kot ki sla.
