Shillong, K’lyngkot, 31: Ka kynhun jong ki nongialam ka BJP, kaba kynthup ia ka President ka Mahila Morcha na Meghalaya, Sikkim, Nagaland bad na kiwei kiwei ki Jylla ka thaiñ Shatei Lammihngi ki la leit jngoh ia i Kong Silbi Passah iba la shah jied ban ioh pdiang ia ka khusnam Padma Shree bad pynkup burom ruh ia i.
La synran lang ia kine ki nongialam ka Mahila Morcha da u Chief Spokesperson jong ka State BJP u Bah Mariahom Khrakrang bad u State Vice President u Gagan Jain lem bad ki dkhot ka Party.
Ha u kyrwoh ba la phah sha ki lad pathai khubor, ka BJP ka la ong pynpaw ba kane ka jingioh khusnam jong i Kong Silbi Passah ka long ka long sa uwei pat u mawmer ban ithuh ia u synniang u bynhei sha ka rwai ka siaw bad ka put ka tem.
Ha ka jingiaid lynti kaba jrong, i Kong Silbi i la ioh pdiang ia ka khusnam Sangeet Natak Akademi, nangta, ka khusnam Indian Chamber of Commerce for Affirmative Action Front- Liners, ka khusnam Prasar Bharati bad ka Meghalaya Day Award.
Na ka liang jong u Bah Mariahom Kharkrang haba ai jingkren ha ka jingialang ba lyngkot, u la ong, “da ki snem i Kong Silbi i la khring ia ki paidbah da ki sur jingrwai tynrai. Dei tang ka Sorkar jong u Narendra Modi kaba la ithuh ia u synniang u bynhei ban pynkup burom da ka khusnam Padmashree. Kane ka jingai jingiathuh khatduh iawai ka la nang pynriewspah shuh shuh ia ka put ka tem ha ka rynsan jong ka ri bad kaba pynpaw ba dei tang ka Sorkar BJP kaba lah ban rah ia ka Jylla Meghalaya shajrong.”
Ka President jong ka Meghalaya BJP Mahila Morcha ka Kong Susuki Pariat ka la ong, “i Kong Silbi Passah i la long ka jingsarong ia ka thaiñ Shatei Lammihngi baroh kawei. Nga ai khublei ia ka Sorkar u Modi kaba ai jingithuh ia ka jingtrei shitom jong ka kynthei riewlum na ka jylla Meghalaya.”
