Shillong, K’lyngkot, 31: Kum shi bynta ka jingrakhe ia ka jingdap 10 snem jong ka seng mynta u snem 2024, ka Blood Donation Cell jong ka HYC ha ka sngi Balang ka la pynlong da ka jingnoh synñiang ia la ka snam da ki dkhot kaba la long ha Community Hall, NEHU, Shillong ha ryngkat ka jingiatreilang bad ka Transfusion Medicine & Blood Centre, NEIGRIHMS, Shillong, ka Meghalaya AIDS Control Society bad ka Meghalaya State Blood Transfusion Council.
Da ki phew ngut ki dkhot jong ka Seng ki la noh synniang ia la ka snam bakordor ka jong ki kum shi bynta ban iarap ia kito kiba donkam kyrkieh ia ka snam ha ki jingpang jingshitom ki jong ki.
Na ka liang ka Blood Donation Cell jong ka Seng ka ai khublei ia baroh ki dkhot ka Seng kiba la ban ia shim bynta ha kane jingai snam ei bad ngeit skhem ba lyngba kane ka jingai snam ka jong ki kan long ka jingkyrkhu ia kiba bun ki mynsiem briew kiba kordor kiba lah ban ioh ia ka jingiarap lyngba kane ka snam.
“Ngi ai khublei ruh ia ki Doctors, ki Counsellors bad ki staffs napoh ka Hospital NEIGRIHMS kiba lah wan ban pynbit pynbiang ia ki jingdonkam baroh na bynta kane ka Prokram bad lyngba ka jingiatreilang ngi la lah ban pynlong ia ka prokram kaba jop,” ong u Chairman, Blood Donation Cell, HYC– CEC, Shillong Bah Wellanstar Warpih.
