Shillong, Rymphang, 17: U Symbud Myntri Rangbah ka Jylla u Sniawbhalang Dhar ryngkat ka jingsynran lang jong ki arngut ki Myntri ka Sorkar ba kynthup ia u Bah Paul Lyngdoh bad ka Dr. Ampareen Lyngdoh, lem bad u Executive Member ka Khasi Hills Autonomous District Council (KHADC) Bah Teiborlang Pathaw, u Bah Hamletson Dohling bad u Commissioner & Secretary ka tnad Arts and Culture Bah Fedrick Kharkongorha ka sngi Thohdieng ki la leit jngoh ia ka along ba la set ia u Syiem Tirot Sing ha Dhaka, Bangladesh da ka Sorkar Bilat.
U Syiem Tirot Sing u la iap ha Byndi ha Dhakha ha ka 17 tarik, Naitung, 1835 hadien ba la kem ia u da ki shipai ka Sorkar Bilat namar ka jingieng pyrshah ia ka Sorkar ban pynher krad na ka Hima Nongkhlaw.
Kane ka along kaba la set ia u Syiem Tirot Sing, mynta la tip kyrteng ia ka, kum ka Dhaka Central Jail.
La synran lang ia ki Myntri da ki Pulit jong ka Dhaka nalor kiwei de ki riew rangbah ki la leit lang sha Dhaka ha ka jingplie ia u durmot jong u Syiem Tirot Sing ha phyllaw jong ka Indira Gandhi Cultural Centre (IGCC).
