Shillong, Risaw, 30: Ka kynhun ba kynthup ia 14 ngut ki Nongthoh Khubor na Maharashtra mynta ka sngi ki la leit jngoh ia ka shnong Mawlynnong, kawei na ki shnong ba khuid tam ha Asia. Ka kynhun ki nongthoh khubor ka la iaroh ia ka deiriti bad ka rukom im kaba iaineh jong ka jylla Meghalaya kaba la don ka jingiahap bad ka mei mariang naduh ki por mynshuwa. Ka kynhun ka la leit ruh sha Shnongpdeng bad pynlut por harud ka wah Umngot kaba khuid.
Ki nongthoh khubor na ki bynta bapher bapher jong ka Maharashtra ki la wan sha Meghalaya bad Assam naduh ka 29 tarik Risaw 2023 haduh 4 tarik Naiwieng 2023 kum shi bynta ka Media Tour ba la pynlong da ka Press Information Bureau, Maharashtra – Goa, Tnat Information and Broadcasting, Sorkar India. Ki nongthoh khubor ki la poi ha nongbah Guwahati hynnin ka sngi bad la pdiang sngewbha ha ki dustur tynrai.
Ha ki sngi ban wan, ki nongthoh khubor kin leit iakynduh ia ki kynhun bapher bapher bad iakynduh ia ki riewpawkhmat jong ka Assam bad Meghalaya. Ki kynhun bapher bapher ba ki nongthoh khubor kin leit iakynduh kilong ka Assam Rifles, North East Council, Khasi Hills Autonomous District Council, Assam Police, Tourism Department, AIIMS -Guwahati, IIT-Guwahati bad kiwei kiwei. Kin iakren ruh bad ki lad pathai khubor ba don ha ka thain.
Ka Media Tour kadei kaba la thmu ban plie lad ban sngewthuh ia ki sienjam bapher bapher jong ka sorkar ba la sdang ha ki jylla ka thain shatei lammihngi jong ka Meghalaya bad Assam. Ka thmu ruh ban plie lad ban sngewthuh ia ka deiriti jong ka thain. Kum kine ki jingiakren kin ai jingtip ia ki nongthoh khubor shaphang ki jinglong jingman jong ki briew ka thain, ka ioh ka kot bad ka imlang sahlang bad ka jinglong ki kam saiñpyrthei ha ka jylla bad ki sienjam jong ka sorkar ba iadei bad ka roi ka par. La kyrmen ba lyngba kane ka tour, kan don ka jingiatreilang kaba jrong samoi hapdeng ki lad pathai khubor bad ki tnat sorkar ha kine ki artylli ki thain ka ban plie lad na ka bynta ka jingiasam jingmut.
La pynlong ia ka Media tour hapoh ka jingialam jong ka Jaydevi Pujari Swami, Deputy Director, PIB Mumbai ryngkat ka jingkyrshan jong ka PIB Shillong, PIB Guwahati bad DDK Shillong. Ki kynhun pathai khubor print bad electronic ha ki ktien Marathi, Hindi bad English ki la iadon bynta ha kane ka Media Tour.
