Shillong, K’lyngkot, 09: Kum shi bynta ka Media Tour hapoh ka Viksit Bharat Sankalp Yatra ka kynhun jong ki Nongthoh khubor na Uttar Pradesh ka la wan jngoh ia ka jylla Meghalaya.
Hynnin ka sngi ka kynhun ka la leit jngoh ia artylli ki jaka ha kaba la pynlong ia ka prokram jong ka Viksit Bharat ha East Khasi Hills District ba kynthup ia ka shnong Mawmihthied bad ka shnong Swer. Ki Nongthoh khubor ki la ioh lad ruh ban iakren bad ki ophisar jong ka Sorkar Jylla, ki Rangbah Shnong bad ki briew kiba ioh myntoi ia ki skhim sorkar ba iadei bad ka bha ka miat.
Ki jing thmu ba kongsan jong kane ka media tour kilong ban plie lad ia ki nongthoh khubor ban iohi dalade ia ka jingiaid shaphrang ki skhim sorkar pdeng bapher bapher ba pyntreikam ha Meghalaya bad ban plie lad ia ka jingthoh khubor shaphang ki kam bapher bapher ba la pyntreikam da ki tnat sorkar pdeng bad ban iohi kumno ki kali Viksit Bharat Sankalp Yatra IEC Van ki ai jingtip shaphang ka jingpyntreikam ia ki skhim bapher bapher ha jylla Meghalaya.
Shuh shuh, ka plie lad ruh ia ki Nongthoh khubor jong ka jylla Uttar Pradesh ban sngewthuh ia ki jinglong jingman ha kaba iadei bad ka jingseisoh ki skhim jong ka sorkar pdeng ha Meghalaya.
Ka Bureau ka la pynlong ia ki press tour ha ki jylla bapher bapher ban iarap ia ki nongthoh khubor ba kin iohi dalade ia ki kam pynroi kiba dang pyntreikam ha ka ri bad iarap ia ki ban ai jingtip shaphang ki polisi ba kongsan jong ka sorkar.
Ia ka Press Tour la pynlong da ka Press Information Bureau, Shillong ha ka jingiatreilang bad ka Press Information Bureau, Lucknow hapoh ka jingkyrshan ka Tnat Information & Broadcasting Sorkar India.
Ka kynhun jong ki Nongthoh khubor ka la leit jngoh ruh ia ki stall jong ki skhim sorkar ba la buh ban ai jingtip shaphang ki skhim jong ka sorkar khnang ban pynpoi pura ia ki skhim bad ai jingmyntoi ia ki briew kiba haduh mynta kim pat ioh ia ki jingmyntoi jong kine ki skhim.
Ka kynhun ka la iaroh ia ki sienjam jong ka sorkar jylla ban pynlong ia ka Viksit Bharat Sankalp Yatra kaba jop wat ha ki jaka nongkyndong.
Ha ka jingsah jong ki ha Meghalaya haduh ka 11 tarik Kyllalyngkot, 2023 kin leit jngoh ruh ia ka West Jaintia Hills bad Ri Bhoi district ban sngewthuh ia ki jinglong jingman ha kaba iadei bad ka jingseisoh ki skhim jong ka sorkar pdeng ha Meghalaya.
