Shillong, K’lyngkot, 09: Lai ngut ki samla pule proh jabieng jong ka IIM, Shillong ba kynthup ia ka Kashish Sharma, ka Saagarika Bhasker bad ka Sampada Dubey ki la ioh pdiang ia ka baibam kaba la tip kum ka Aditya Birla Scholarship.
Ka IIM Shillong ka ju pynmih ia ki samla pule kiba stad kiba ju iai bteng ban ioh ia ka Aditya Birla Scholarship, ka baibam kaba pawnam ha ka ri.
Ka jingsdang ban ioh ia kane ka baibam, ka la sdang ha u snem 2011 haba uwei na ki samla pule jong ka IIM Shillong u la ioh ia ka Scholarship ha ka sien kaba nyngkong eh bad kane ka la long ka jingsdang ban ioh ia ka baibam. Nangne shakhmat, sa 15 ngut ki samla pule jong ka IIM Shillong ki la shah jied ban ioh pdiang ia kane ka baibam, halor ka jingtrei shitom jong ki ha ka jingpule.
Ka IIM Shillong ka ai khublei ia ki nongioh baibam jong u snem 2024 ba kynthup ia ka Kashish Sharma, ka Saagarika Bhasker Panyam, bad ia ka Sampada Dubey kiba dang pule ia ka PGP-2023-25, IIM Shillong na ka bynta ka jingioh pdiang ia ka baibam.
Ha kajuh ka por, ka samla Aastha Ratti ka la ioh pdiang ia ka OP Jindal Scholarship ka dei kaba dang pule ia ka PGP-2023-25).
Ka Aastha kaba long kawei napdeng ki 20 ngut ki samla pule kiba wan shakhmat ha ka jingpule na ki B-Schools ha ka ri India kiba la pynpaw ia ka jingproh jabieng ha ka jingpynlut por ban pyndep ia ka jingpule ha ka MBA. Ki la pynpaw ka jingsngewnguh ia ka OP Jindal Group kaba la ai ka jingithuh na ka bynta ban ioh ia ka baibam.
