Shillong, Nailar 20: Ki nongtrei SSA ha ka sngi Baar ki la pynkut noh ïa ka jingïakhih kaba khlem pud sngi bad samhitha Madan Malki, hadien ba ki la pdiang ïa ka jingpynïabiang jong ka Rationalisation Committee ïa ka rukom siew tulop ïa ki nongtrei ha ki Block Level, ki Cluster Level bad ha ki District Level.
Ka President jong ka All Meghalaya Non Teaching Staffs Association (AMNSA) ka Kong Jennyfer Synrem ha ka jingïakren bad ki lad pathai khubor ka la ïathuh ba ka Sorkar ka la ai da ka jingthoh ban pyntreikam noh ïa ka Increment kaba 2 percent katkum ka Seniority ne ka jingtrei slem ha ka kam bad ka Annual Increment kaba 5 percent manla u snem.
“Ha kaba ïadei bad ka jingpynkiew tulop ba 80 percent na ka liang jong ka Sorkar kam shym la mynjur hynrei kum ka Seng ngi hap ban shu hun noh namar ba ka Sorkar ka la pyntreikam da ka Basic Pay kumba long ki nongtrei sorkar ha kaba don ruh ka jingpynbeit ryntih ïa ka tulop naduh ki District Level haduh ki Block Level, khnang ba ka jingsiew kan nym long kumjuh ïa ki nongtrei kiba dang shu tei mynta bad kiba la trei 16 snem,” la ong ka Kong Synrem.
Ka Kong Synrem ka la ïathuh ba ka Rationalisation Committee ba la khlieh da u Commissioner and Secretary ka tnat Pule Puthi u Vijay Kumar Mantri kan dang ïai bteng beit haduh ki snem ki ban sa wan ban bishar ïa ki jingdawa jong ki nongtrei SSA.
