Shillong, Jymmang 05: U lapbah uba jur u la ther ha ka sngi u Blei ha ki kylleng ki bynta jong ka jylla Meghalaya.
U lapbah u la sdang ban hap ha ka por kumba 10:00 baje tam eiei ha nongbah Shillong kat haduh ba ki lynti ki syngkien kin la shlei da ka um na ka jingset jong ki platik bad ki jaboh jabaiñ ïa ki nala rit bad ki nala heh.
Shwa ba ban ther u lapbah lapsan ka suiñ bneng ka la dum hi ngaiñ. Ki briew ki la shong rit mynsiem ha la ïing namar ka jingtied u pyrthat bad ka jingthaba ka leilieh ka la long kaba ishyrkhei bha.
Kumba ha ka por 10.30 baje mynstep ka eriong ka la beh kynsan bad ka la jynrat haduh 20 tylli ki ing ha ka shnong Mawlynrei, Shillong bad pynkhyllem ruh ïa u nar post elektrik.
U Rangbah Shnong ka Mawlynrei Bah Ornel Pyngrope u la ïathuh ba ki iing kiba la shah pynjulor ha kane ka eriong ki don 20 tylli ha ka por ba la leit jurip da ki nongkitkam shnong.
U Bah Pyngrope u la ïathuh ba ha kane ka jingshah lynshop ha ka mariang kam shyn don kano kano ka jingjia basngewsih ne kano kano ka jingktah ïa ki briew bad u la ong ba ka shnong kan dang jurip ban lap ïoh dang don shuh ki ing kiba la shah pynjulor.
Ka jingjur jong u slap ka la wanrah ruh ïa ka jingshlei um hapdeng surok Lachaumiere mar pyrshah ka Ophis DIPR, Shillong ha kaba la sakhi ba ki kali ki la hap ban ïaid napdeng ka um kaba la shlei hapdeng surok.
Ha ka por kumba 11:00 baje tam eiei u slap uba jur u la ther ha ka thaiñ Mawnai bad ki shnong kiba don marjan kiba hap hapoh ka Eastern West Khasi Hills District bad nalor kata ki la shah lynshop ruh ha u phria.
Ka jinghap jong u phria ka long kaba jur haduh katta katta haduh ba ki tnum iing ki la satah da u phria bad ki tnum kali ruh kumjuh.
Nalor kata, ki don ruh ki tnum iing kiba la pei na ka jinghap jong u phria.
Kane ka jingap jong u phria ka la pynjulor ruh ïa ki mar rep ha kane ka thaiñ namarba bun na ki nongshong shnong ki dei kiba dang im ha ka rep ka riang.
Ïa ka jingduh jingsep ha ka shnong Mawnai ym pat lah satia ban ïoh ïa ka jingtip kaba bniah kat haduh ba thoh ïa kane ka khubor.
Ka thymmei khubor ka ïathuh ba ki bor synshar jong ka East Khasi Hills District ki la phah ïa ki briew jong ka sorkar ban leit ban jurip halor kane ka jingshah pynjulor ha ka mariang.
U phria uba jur u la hap ruh sha ki bynta jong ka thaiñ Pynursla, Mawsynram, Rambrai, ki bynta ka shnong Kynshi bad Sohra.
