Mawkyrwat, Jymmang, 05: Ka Dorbar Shnong Wahsiej, Maharam Syiemship, South West Khasi Hills District ha ka sngi Thohdieng ka taiew baladep ka la pynkup burom ia u Heprit Elambok Dkhar, 13 snem ka rta kum u riewshlur halor ka kam shlur ba u la leh da kaba pyllait im ia kawei ka khynnah samla kaba kyrteng ka Saphibanroy Thongni (15 snem ka rta) na ka jingngam jyllop ha Wah Rilang ha ka 21 tarik Iaiong, 2024.
Ha ka 21 tarik Iaiong 2024, ka shnong Wahsiej ka la iam briew hadien ba ar ngut ki khynnah samla, kata, ka Shabakmenlang Wanniang (16 snem) bad ka Aishabankmen Thongni (14 snem) ki la ngam jyllop noh ha kawei ka thwei ha Wah Rilang, kaba ki khot ka thwei Breimeirit katba ki dang ia jngi.
Nalor kane, ka Dorbar Shnong Wahsiej ka la pynkup burom Riewshlur ruh ia uwei u rangbah, u Bah Lambok Thongni uba la jngi bad leit sei hi marwei ia kitei ki ar tylli ki metiap.
Ha kane ka jingjia, ka Saphibanroy Thongni kaba dei ka hymmen trai jong ka Aishabankmen Thongni ka la noh lang shapoh thwei ban iarap ia la kajong ka para, hynrei ka la shah tan lang hapoh um, hynrei donbok ba la wan lap da utei u Heprit Elambok Dkhar uba la jngi shapoh um bad pyllait im ia ka.
Nalor ka Dorbar Shnong Wahsiej, kiwei pat kiba la pynkup burom ia u Heprit Elambok ki kynthup ia ka Seng Samla Shnong Wahsiej, ka Social Economic Life and Development (SELD) Committee jong ka Jingiaseng Samla Balang Presbyterian Wahsiej, ka Iatreilang Village Organisation, ka Wahsiej Sports Club, Wahsiej Govt LP School, ka Banrikynti LP School, bad ka Church of God LP School.
Ha kane ka sngi la iadonlang u Deputy Commissioner jong ka South West Khasi Hills District, Bah T. Lyngwa kum u kongsan ha ryngkat ka jingiadonlang ka Kong A. Sawkmie, SI Mawkyrwat Police Station, bad kumjuh ruh ki ophisar napoh District Child Protection Office, District Social Welfare Office bad Block Development Office, Mawkyrwat.
