Shillong, Lber, 08: Ka jingïalang jong ka Expert Committee ban khmihbniah biang ïa ka State Reservation Policy, Meghalaya kaba la thaw lyngba ka jingpynbna ka ha ka Notification NO. PER(AR) 49/2023/PT/3 ka 12 tarik u Nailur ,2023 hapoh ka jinglong chairman u Justice(Retired) Mool Chand Garg, ka la pynlong ïa ka jingïakynduh lang kaba nyngkong ha ka sngi Thohdieng.
Ha kane ka jingïalang ki heh ophisar jong ka sorkar jylla ki la ïadonlang.
Ha shwa kane na ka liang ka committee ka la pynlong ïa kiba bun ki jingïalang. Na ka liang u Chairman bad ki dkhot ki la leit ban jngoh ïa ka ophis jong ka Expert Committee kaba don ha Building jong ka Assistant Commissioner of Food and Safety, Lachumiere, Shillong.
Ki dkhot jong ka committee ki la pynlong ruh ïa ka jingïalang ha kaba ka la don ka jingïalang kaba ki la ïasyllok halor ki kam kiba dei ban leh nangne shakhmat.
Ïa kane ka committee la thaw ban khmihbniah ïa kane ka reservation policy kaba mynta hapoh ka jylla Meghalaya.
Ïa ka jingïalang ka ban long hadien pat kan dei ha u bnai Ïaïong jong une u snem, 2024.
