Shillong, Naiwieng, 30: Ka MLA jong ka East Shillong Constituency ka Dr. Ampareen Lyngdoh kaba la shah jied kum ka kyrtong jong ka National Peoples Party (NPP) ban ïakhun na ka Shillong Parliamentary Constituency ha ka sngi Palei ka la lum lang ïa ki saw ngut ki MLA ka party na rilum Jaiñtia bad ïa ki nongïalam bahakhmat eh ka NPP na ki hynñiew tylli ki Constituency kiba don ha rilum Jaiñtia.
Ha kane ka jingïalang, la ïashim bynta lang da u Symbud Myntri Rangbah ka Jylla u Bah Sniawbhalang Dhar, u Myntri Sorkar u Bah Comingone Ymbon bad ki MLA kiba kynthup ïa ka Kong Santa Mary Shylla bad u Bah Wailadkimi Shylla, u Chief Executive Member jong ka Jaiñtia Hills Autonomous District Council (JHADC) u Bah Thombor Shiwat bad kiwei kiwei.
Ïa ka Dr. Ampareen Lyngdoh la synran lang da ki bahaing hasem kynthup ruh ïa u khun shynrang bad ka khun kynthei.
Ïa kane ka jingïalang la khot da ka Dr. Ampareen Lyngdoh ha nongbah Shillong kum ka jingpynkhreh ïa kane ka elekshon khnang ban pynthikna ba ki dkhot bad ki nongïalam jong ka NPP kin durut tyngeh ha rilum Jaiñtia ha ka elekshon sha ka Ingdorbar Thawaiñ Lok Sabha ka ban sa long ha u snem ban sa wan.
U Bah Sniawbhalang Dhar ha ka jingïakren bad ki lad pathai khubor u la ong, “ngi sngewkmen ba ki nongïalam na ki hynñiew tylli ki Constituency ruh ki la wan poi lut. Ka jingïalang ka long ban ïathir ïatai kumno ban trei shitom bha khnang ba ka kyrtong kan ïoh ïa ka jingjop.”
Haba kylli, u la ong, “kum ki nongïalam jong ka Party ngi don ka jingsngewskhem bad ngi kwah ban pynjop donburom i Dr. Ampareen.”
U la ong ba katkum ka jingïohi jong u, ki paidbah nongthep vote ka Jylla Meghalaya ki la sdang ban kyntait bad lah ban dei ka thong jong ka NPP ban ïohrah ïa ka jingjop ha kane ka kynti.
Ha ka elekshon MLA ba dang shu dep long shen, u Bah Vincent H. Pala u la shah rem noh ha ka Kong Santa Mary Shylla kaba long ka kyrtong jong ka NPP.
“Ha ka elekshon ba ladep, u (Bah Vincent Pala) shah rem ha ka kynthei bad kumba kren biria mynta ruh ha ka kynthei ka lah ban jop bad u lah ban shah rem biang. Kata ka dei ka jingkren biria jong ki nongkren hynrei ngi don ka jingkyrmen bad ngi kwah ba ka kyrtong jong ngi kan jop ha ka elekshon ka ban sa wan,” ong u Bah Dhar.
Haba kylli, hato ka VPP kan long diengpyngkiang ne em ïa ka NPP ha ka elekshon Lok Sabha, u Bah Sniawbhalang ula ong, “ka VPP ka don la ka jong ka vote bank, ka Congress ka don la ka jong ka vote bank, ka BJP ka don la ka jong ka vote bank bad ka NPP ruh kumjuh hi. Ha ka elekshon MLA ba ladep, ka NPP ka ïoh khur vote haduh 3.50 lak kynthup lang ïa u Bah Banteidor Lyngdoh bad u Bah Gavin M. Mylliem kiba la pynïasoh bad ngi.”
