Shillong, Naiwieng, 30: Ka Sorkar Jylla ka la buh sngi ban khot ïakren ïa ki nongïalam jong ka Harijan Panchayat Committee (HPC) ha kaba ïadei bad ka jingpynkynriah ïa ki briew kiba sah ha Them Iew Mawlong.
U Symbud Myntri Rangbah ka Jylla uba peit ïa ka tnat Pynroi Sor Bah Sniawbhalang Dhar ha ka jingïakren bad ki la pathai khubor ha ka sngi palei u la ïathuh ba ha kane ka jingïalang ka ban sa long shen, yn ïakren ïa ka jingkyrpad jong ki nongïalam ka Harijan Panchayat Committee (HPC) ïa ka Sorkar ban pynbeit khyndiat kynsoit ïa ki katto katne ki jingïapynbeit ha ka Blue Print ïa kiba yn sa shim rai ha kane ka jingïalang.
“Ha ka jingïalang kaba la long ha kine ki bnai ladep, ki (HPC) kyrpad ïa ka Sorkar ym dei ba ki dawa ban pynkylla khyndiat ïa ka Blue Print. Ngi la pyrshang ban pynbeit khyndiat khynsoit katba ngi lah bad ka rai kaba khatduh kaba ngin sa shim kan long beit ha ka 7 tarik, Nohprah,” ula ong.
Haba kylli, ula ong ba kaei kaba don ha ka Blue Print ka Sorkar kan sa ïakren beit ha kane ka jingïalang ka ban sa long.
