Shillong, Nailur 12 : Ka tnat ka Koit ka Khiah jong ka Sorkar Jylla mar mar ka la phah pynlong ia ka jingtohkit kaba bniah hadien ba la ioh jingtip ha ka lah sngi U Blei ba la lap ia ki ar tylli ki prek hapoh u dawai Capsule Amoxycilling ba la ai sha kawei ka nongpang kaba leit shim dawai na Pomlum PHC, East Khasi Hills District.
Ka kynhun kaba kynthup ia u Senior Specialist ha ka Pharmacology bad u nongpeit ia ki dawai na ka MMDSL, kynthup ruh ia u Inspector of Drugs jong ka East Khasi Hills bad u Logistics Manager ki la leit mar mar sha kane ka PHC ban pynlong ia ka jingtohkit.
Kane ka kynhun tohkit, ka la lap ba ki ar tylli ki prek ba la thep hapoh u dawai Capsule, katkum ba la kam da kawei ka longiing ba shim dawai, u kham heh ban ia u snep dawai Capsule bad kane ka la pynsuba eiei halor kane ka jingujor jong ka nongshim dawai.
Ia ki nuksa jong u dawai capsule la shim ruh na kiwei ruh ki dawai bad la shem ba kim shym la sniew ne don satia ki prek ne kino kino ki kynja tiar hapoh ki snep dawai.
“Ngi la peit bniah la ka don shisha ne em ka jingujor ia une u dawai na kiwei kiwei pat ki jaka ai dawai. Hynrei kam don satia kaba kum kata. Watla, katta ngi la pynlong ka jingtohkit sa shisien ban pynthikna ba kum kine ki jingjia kim dei ban don,” ong u kyrwoh na ka tnat ka Koit ka Khiah. “Ngi kyrpad ia ki paidbah ai ka jingiatreilang ha ka jingpyrshang jong ngi ban ai ia ka jingshakri kaba kham bha sha ki paidbah. Ki paidbah ki lah ban pyndonkam ia u Helpline Number 14410 lada ki don ia kino kino ki jingujor halor ki dawai dashin bad kiwei kiwei, khnang ba ngin dup lah ban ai jingpynshai ia ki,’ la bynrap u kyrwoh.
