Shillong, Nailur 12: Ka jingpyrshang jong ki shipai suiñ Indian Air Force (IAF) ban kyntur pud shabar na u pud u sam jong ka ktem sah lajong ka pynbitar lep ia ki paidbah nongshong shnong jong ka dong Khliehshnong, Rngi Shyllong, kaba dang hap hapoh ka Nongkrem Constiutuency.
Ka kynhun lum khubor jong ka BatesiTV ha ka sngi baar ka la sakhi ba ki shipai suiñ ki la kyntur pud sha surok PWD da kaba tih thliew thymmai ban pynieng paia markhap bad ka khyrdop kaba rim ban rung sha ka jaka jngohkai pyrthei ha Lum Shyllong.
La lap shuh shuh ba ki shipai suiñ ki ladep pynieng ruh ar tylli ki païa bad tih ruh ia ka thliew muri kaba heh da ka puh shilum.
Na ka liang jong u MLA ka Nongkrem Constituency u Bah Ardent Miller Basaiawmoit ha kane ka step ryngkat lang bad ki paidbah nongshong shnong ka Rngi Shyllong ki la leit tur sha kane ka jaka ban dawa ia ki shipai suiñ ba ki dei ban pynsangeh noh mardor ia kane ka jingkyntur pud.
U Wing Commander jong ka Indian Air Force (IAF) ka Eastern Air Command (EAC), uba la wan mihkhmat na ka liang jong ki shipai suiñ, u la kular ban pynsangeh noh mardor ia kane ka jingtrei bad ha kaba iadei bad kane ka Deputy Commissioner jong ka East Khasi Hills District ka Kong Rosetta Mary Kurbah ka la rai ban sa khot iakren halor kane hapdeng ka tnat PWD, ka tnat shipai Suiñ bad ka Dorbar Shnong Rngi Shyllong.
