Shillong, Jymmang 20: Ka Director General of Police ba thymmai jong ka jylla ka Kong Idashisha Nongrang kam shym la kyntait satia halor ka jingkynnoh ba ki don ki Pulit kiba khrong pisa na ki trok ha ki bynta bapher bapher jong ka jylla.
Ha ka jingiakren bad ki lad pathai khubor ha ka Lah Sngi u Blei ka Kong Nongrang kaba la shimti ia ka shuki DGP ha kane ka sngi, ka la ong ruh ba ka jingleh tang jong uwei ne ar ngut ka la pynjah burom ia ka tnat Pulit, hynrei ia ka jylla hi baroh kawei.
Halor kane ka DGP ka la ong ba kan sa shim ia ka sienjam kaba tyngeh ha kaba iadei bad ka jingkhrong pisa jong ki Pulit na ki kali.
Kum shi bynta ban wanrah ia ka shongsuk shongsaiñ hapoh ka jylla baroh kawei bad ba ki samla kin ym shah ialam bakla da kaba pyniasoh sha ki seng kieng atiar, ka Kong Nongrang ka la pynpaw ba ki Pulit ki donkam ia ka jingiatrei lang jong ka imlang ka sahlang.
Ka jingdon jong ki Pulit kam dei ban pynthut lane ban pynwit ia ki paidbah hynrei ka long ban ai ka jingshakri ia ki paidbah.
Ka Kong Nongrang ka la ong ruh ba shisien ha ka shitaiew kan don ka Open House ne ka jingialang bad ki paidbah kiba kwah ban kynduh ia ka, kata, lehse ha ka sngi Palei naduh ka por 11:00 baje mynstep haduh ka por 2:00 baje noh sngi tangba ki dei ban da ai jingpyntip shwa ia ka sngi.
Ka la ong ruh ba kum ka Ophisar ba hakhlieh duh jong ka tnat Pulit kan sa shimkhia ban peit ia ka jingkiew ka jingshah thombor jong ki kynthei bad ki khynnah bad khamtam ruh ka jingshngaiñ jong ki kynthei.
Shuh shuh ka la pynpaw ia ka jingsngewkhia halor ka jingroi stet jong u drok hapoh kane ka jylla bad kumjuh ruh halor ka jingkylla ktem dih drok jong ka nongbah Shillong bad ha kiwei kiwei ki bynta jong ka jylla.
Kum ka khliehduh jong ka tnat Pulit, ka Kong Nongrang ka la iathuh ruh ba ka tnat Pulit jong ka Jylla ka don ka jingiatreilang kaba jan bha bad ki tnat treikam jong ka Sorkar India ban khanglad bad tehlakam ia ka jingshah thok pisa ki paidbah lyngba ka Cyber Crime.
Ka la iathuh ba ka Cyber Crime hapoh ka jylla Meghalaya kam pat iahap bad kiwei de ki jylla bad dei halor kane ka tnad Pulit ka la phah ia ki Pulit ban leit shah hikai pyntbit ha kane ka kam.
Ha kaba iadei bad ka jingdheng kali ha Sor Shillong ka kong Nongrang ka la pynpaw ba kane baroh ka dei na ka jingbym shna pynheh shuh ia ki surok ha nongbah Shillong da ki phew snem naduh ba ka Meghalaya ka la ioh ia la ka Jylla.
Ka la ong ba ha ki 15 snem mynshwa ba ki kali ba la rejistar hapoh ka ophis District Transport Officer (DTO) kam pat kot satia haduh shi spah tylli ha ha ka shi snem hynrei mynta tang ha ka shi sngi ki kali ba la register kim duna haduh 10 tylli.
