Shillong, Jymmang 25: Ka Indian Meteorological Department (IMD) ka la maham lypa ba ka jinglong ka jingman jong ka suiñbneng kan don ka jingther jong u lapbah uba jur bha naduh ka miet 26 tarik haduh ka 28 tarik mynta u bnai.
Ka IMD ka la maham ba ka la don ka jingkylla ha ka jinglong jingman jong ka suiñbneng bad ka jingbeh ka lyer kit slap ha ki bynta jong ka East Central na ka duriaw Bay of Bengal bad sha ka North-North-Eastward ha ka jingsted kaba 15 Km/ph.
Na ka bynta ka jylla Meghalaya ka IMD ka maham ba ka lyer kit slap kaba stet haduh 40-50 kmph ha ki hynriew kynta ban sa wan bad kaba la antad haduh 60 kmph kan lynshop ha ka 27 tarik mynta u bnai.
Ki paidbah nongshong shnong ka Meghalaya ki dei ban peitngor bad ban phikir bha hashwa ban wan ka erïong. Ka IMD ka la kyntu ia ki paidbah ba kim dei ban shah ialam bakla ha ki khubor lamler bad ki dei ban wad ki lad ai jingtip lyngba ki Television, ki lad pathai khubor bad kiwei.
La bthah ruh ia ki paidbah ban pynlip ia ki tiar bording bad ka Gas. Khang bha ïa ki jingkhang bad ki khalki, lada ki ïing ki long ki bym shngaiñ kiar noh na ki ha shwa ban sdang ka jingwan ka erlangthari. Kiar na ka rung ha ki jingtei ki ïing ba la sniew, peitbha ïa ki post ding ilektrik kiba la sdang ban khyllem, ki waiar, leit wad ki lad jingïarap katba lah, kynduh barabor ïa ki ANM, ASHA bad ïa ka kynhun ka First Aid ha shwa ban dih dawai.
