Shillong, Nailar 28: Ka Hynniewtrep Integrated Territorial Organization, West Jaintia Hills District ha ka Lah sngi U Blei, hapoh ka jingialam jong u President u samla Wanbiang Pulang ki la leit ban tah da ki jingthoh ha kylleng ka sor Jowai bad ha ki katto katne ki bynta jong ka West Jaintia Hills District ban mana ia baroh ki dukan Hardware kiba die ia ka dewbilat ba kim bit shuh ban die ia ka dewbilat ba la pynmih da ka Topcem tad haduh ban da lah ba pynbeit ia ki jingkulmar kiba jia ha ka 24 tarik, Nailar, 2033 ka sngi ba la pynlong ia ka jingpynsngew paidbah jong kane ka karkhana pynmih dewbilat.
Kum ban shu pynkynmaw hangne, ka HITO ka la shim ia kane ka sienjam hadien ba arngut ki nongtrei bar jylla jong ka Meghalaya Cements Limited, kaba pynmih ia ka dewbilat Topcem ki la kynshoit ia ki Pulit ban kawut lathi naphang ia ki paidbah kiba pyrshah ia ka jingpynlong ia ka jingpynsngew paidbah.
Ha kane kajuh ka sngi, ki nongialam jong ka Jaintia Students Union (JSU) ki la dawa ia ki bor pyniaid jong ka karkhana Meghalaya Cements Limited ba dei ban beh kam shi syndon ia ki arngut ki nongtrei bar jylla kiba donkti ban kynshoit ia ki Pulit ban kawut lathi naphang ia ki paidbah ha ka sngi ba la pynlong ia ka jingpynsngew paidbah kaba la long ha ka 24 tarik, Nailar, 2023.
Ki nongialam ka seng ki la pynpaw ruh ba kim hun satia ba ki bor pyniaid jong kane ka karkhana kin shu weng shipor ia ki na ka kam bad kajuh ka por ka seng ka la maham ruh ia ki bor pyniaid lada kine ki arngut ki bar jylla kin dang trei hapoh kane ka karkhana kan sa mih ka jingsngewsih bad ka jingiapher jaidbynriew.
Ha kaba iadei bad kane, ka seng ka la pynsngew ruh ha u Deputy Commissioner ha kaba u la kular ba un sa thoh sha ka Home bad ka Political Department jong ka Sorkar Jylla halor kane ka jingdawa jong ka seng.
